Aýyr atlet Anna Nurmuhambetovaǵa London Olımpıadasynyń kúmis medali tabystaldy
Ulttyq olımpıadalyq komıtettiń habarlaýynsha, marapat Lımada (Perý) ótip jatqan aýyr atletıkadan jasóspirimder arasyndaǵy álem chempıonatynda saltanatty túrde tabystaldy. Sportshy medaldi Perýde Halyqaralyq Olımpıada komıtetiniń qurmetti múshesi Ivan Dıbostyń qolynan aldy.
«Perýdegi álem chempıonatyna kelgenime qýanyshtymyn. Maǵan Olımpıada medalin tabystady. Qazirgi sezimderimdi sózben jetkizý múmkin emes. Federatsııaǵa, meni marapattaǵan HOK múshesine alǵys aıtamyn. 2012 jylǵy Olımpıadanyń kúmis júldegeri atanǵanyma qýanyshtymyn. Bul - meniń mansabymdaǵy eń úlken jeńis. Júlde tabystaý sátin uıymdastyrǵany úshin kóp rahmet. Jas sportshylarǵa tabys, tózim jáne sáttilik tileımin», - dedi Anna.
Aıta keteıik, London Olımpıadasynda Qazaqstan sportshysy 69 kelige deıingi salmaq dárejesinde besinshi orynnan kórindi. Alaıda, qaıta tekserýden keıin marapattar qaıta bólindi. Marına Shkermankova men Dına Sazanovetstiń tyıym salynǵan preparattar qoldanǵany anyqtaldy. Olardyń nátıjeleri joıylyp, Nurmuhambetova resmı túrde Olımpıada oıyndarynyń qola júldegeri atandy.
2020 jyly Londonda ekinshi oryn ıelengen rýmyn sportshysy Roksana Kokoshtyń synamasynan da dopıng tabylǵany belgili boldy. Ol kúmis júldesinen aıyryldy jáne Londonda kórsetken nátıjesi joıyldy.
Júldelerdi qaıta bólgennen keıin Anna Nurmuhambetova 2012 jylǵy Olımpıada oıyndarynyń kúmisine qol jetkizdi. Qola medal kolýmbııalyq Ýbaldına Valleske buıyrdy.
Aıta keteıik, buǵan deıin Qazaqstannyń birneshe sportshysy marapattardy qaıta bólýden keıin Olımpıada medaldaryna ıe bolǵan edi. Ziltemirshi Denıs Ýlanov resmı túrde 2016 jylǵy Olımpıadanyń qola júldegeri atandy. Al ziltemirshi Alla Vajenına araǵa birshama ýaqyt salyp 2008 jylǵy Oıyndardyń chempıony retinde tanyldy.
Dopıng-synamalardy qaıta teksergennen keıin qazaqstandyq grek-rım kúresiniń sheberi Nurbaqyt Teńizbaev 2008 jylǵy Olımpıadanyń kúmis júldesine ıe boldy.
2008 jylǵy Beıjiń Olımpıadasynda tórtinshi oryn alǵan jeńil atlet Olga Rypakova barlyq tekserýlerden keıin kúmis júldeger atandy.