Aýylymyzdy tasqyn sý baspasa eken — Atyraýǵa kóshirilgen turǵyndar
Munaıly shahardaǵy evakýatsııa pýnktiniń biri AREK joǵary kolledjinde ashylǵan.
Qazir munda Mahambet aýdanyndaǵy Taldykól aýylynyń 217 turǵyny turyp jatyr.
Beıbarys aýyldyq okrýgine qaraıtyn eldi mekennen aldyn ala evakýatsııalanǵan turǵyndardyń deni — áıelder men balalar. Arasynda múmkindigi shekteýli 9, kámeletke tolmaǵan 138 bala, 8 júkti áıel bar.
Taldykól aýylynda 1985 jyldan beri turǵan Dámeli Tólekenova evakaýatsııalyq pýnktke kelinimen, 3 nemeresimen kelipti.
Olarǵa eki bólmesi bar bir sektsııa berilgen. Bir qyzy da 4 balasymen osynda turyp jatyr.
«Kúıeýim men ulym aýylda qaldy. Olar kúnbe-kún aýyldyń azamattarymen birge kezekshilikke turady. Úsh nemerem 1, 4 jáne 6-synypta oqıdy. Kelinim Jańylsyn aýyldaǵy mektepte matematıkadan dáris beretin edi. Qazir sabaq onlaın formatta ótedi. Bul pýnktegi ashanada úsh mezgil tamaǵymyzdy ýaqytynda beredi. Dárigerler qan qysymyn ólshep, densaýlyǵymyzdy qadaǵalap otyr. Biraq nemereler „aýyldy saǵyndyq, qashan baramyz?“ dep júr», -deıdi Dámeli Tólekenova.
Taldykóldik taǵy bir turǵyn Venera Júsipova bes balasymen bir sektsııada turady. Balalarynyń biri — stýdent, úsheýi mektepte oqıdy. Eń kishkentaıy 1 jastan asqan.
Al, úlken uly Nurdáýlet Abaı oblysyndaǵy Aıagóz garnızonynda áskerı mindetin ótep júr. Kúzde áskerden oralady.
«Sý tasqynynyń saldary qandaı bolatynyn bala kezimnen bilemin. Ózim Taldykól aýylynda týyp-óstim. Áli de sol aýyldyń turǵynymyn. Meniń de kúıeýim aýylda qalyp, bógette kezekshilikti atqaryp júr. Ákem men sheshem de aýylda qaldy. Olar biraz jyl buryn „Satashev B.“ jáne „Satasheva A.“ sharýa qojalyqtaryn qurǵan edi. Ár sharýa qojalyǵynda 27 gektardan jeri bar. Jyl saıyn 54 gektar alqapqa kókónis jáne baqsha daqyldaryn egip, ónimin aýdannyń, Atyraý qalasynyń jármeńkelerine usynyp júr. Bıyl da egin ekti. Biraq jaqynda 54 gektar alqap tolyǵymen tasqyn sýdyń astynda qaldy», -deıdi Venera Júsipova.
Al, zeınetker Sáýlesh Ǵaısına otbasymen 2008 jyly Taldykól aýylynan jer telimin alyp, úı salǵan eken. Sol úıine Atyraý qalasynan kóship barypty.
«Taldykólde ulym men kelinim qaldy. Ulym bógetti bekitýge, kezekshilikti atqarýǵa shyǵyp júr. Al kelinim aýylda qalǵan áıeldermen birge bógettiń buzylmaýyn qaraýyldap júrgen azamattarǵa tamaq pisiredi. Meniń qasymda eki nemerem bar. Bárimiz de aýylda qalǵymyz keldi. Alaıda kishkentaı nemerelerdiń qaýipsizdigi úshin keldik», -dedi Sáýlesh Ǵaısına.
Onyń aıtýynsha, evakýatsııa pýnktinde barlyq jaǵdaı jasalǵan. «Aman-Saýlyq» emhanasynan arnaıy medıtsına qyzmetkerleri bólingen. Olar turǵyndardyń densaýlyǵyn kúnde tekseredi.
«Munda jaǵdaıymyz jaqsy, qaýipsizdigimizdi polıtsııa qyzmetkerleri qadaǵalaıdy. Tósegimiz — taza, tamaǵymyz — dámdi. Bizdiń bir ǵana tilegimiz bar. Bárimiz de aýylymyzdyń tasqyn sýdan aman qalyp, azamattardyń, áskerı qyzmetkerlerdiń kúni-túni migir tappaı, kirpik ilmeı atqaryp júrgen eńbegi zaıa ketpese eken deımiz. Kún saıyn aýyldaǵy bala-kelinimmen habarlasyp, aýylda qalǵan turǵyndardyń amandyǵyn tilep otyramyn», -deıdi Sáýlesh Ǵaısına.
Eske sala ketelik, budan buryn Taldykól aýylynyń turǵyny balalarynyń qaýipsizdigi qymbat ekenin aıtqan edi.