Aýylǵa baratyn dárigerler memleketten qandaı tólemder alady

<p>ASTANA. KAZINFORM &ndash; QR DSM Ana men bala densaýlyǵyn qorǵaý departamentiniń dırektory Maǵrıpa Embergenova ana men balanyń densaýlyǵyn saqtaý jáne mamandarmen qamtý sharalary týraly aıtyp berdi.</p>

«Búgingi tańda elimizde 5 myńnan astam akýsher-gınekolog (onyń ishinde aýylda – 792) jáne 9 myńnan astam akýsher (aýylda – 3 358) jumys isteıdi, olar jyl saıyn 400 myńǵa jýyq júkti áıeldi qadaǵalap, bosandyrady», - dedi M. Embergenova Ortalyq kommýnıkatsııalar qyzmetinde.

Balalarǵa medıtsınalyq kómek kórsetý úshin 4 myńnan astam balalar dárigeri jáne myńnan astam neonatolog qyzmet etedi.

Kadrlyq áleýetti nyǵaıtý úshin mınıstrlik sońǵy eki jylda maqsatty granttardy eki esege ulǵaıtty.

Aýyldyq jerlerge medıtsına mamandaryn tartý úshin áleýmettik tólemderdiń biryńǵaı paketi ázirlendi. Aýyldyq jerlerde jumysqa kirisken jas mamandar kótermeaqy, eń tómengi paıyzdyq mólsherlememen turǵyn úıge nesıe jáne jalaqyǵa qosymsha tólemder alady.

«2024 jylǵy qańtardan bastap aýdan ortalyqtaryna jumysqa kelgen mamandarǵa arnalǵan bıýdjettik kredıt 2 500 AEK-ke deıin (9,2 mln teńge), al aýyldyq eldi mekender úshin 2 000 AEK-ke (7,3 mln teńge) deıin ósti. Budan bólek, 2024 jylǵy sáýirde Memleket basshysy «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» Zańǵa qol qoıdy, oǵan sáıkes aýyldyq jerlerge jumysqa kelgen, tapshy mamandyqtar boıynsha medıtsınalyq qyzmetkerlerge 100 AEK (2024 jylǵa 8,5 mln teńge) tólenedi», - dedi departament dırektory.

Aıta keteıik, bıylǵy jyldyń 8 aılyq qorytyndysy boıynsha elimizde 275 myń náreste dúnıege kelgen.

Osyǵan deıin Atyraý dárigerleriniń aýyr pnevmonııaǵa shaldyqqan náresteni aman alyp qalǵany týraly jazdyq.