Aýyldy jerlerde órtten qorǵanatyn tehnıka da, múmkindik te joq – Májilis depýtaty

<p>ASTANA. KAZINFORM &ndash; Elimizdegi aýyldyq okýrgterde órtten qorǵaný múmkindikteri óte tómen jáne tıisti tehnıkalar alynbaǵan. Bul jóninde Májilis depýtaty Únzıla Shapaq QR Premer-Mınıstriniń birinshi orynbasary Roman Sklıarǵa saýal joldady. &nbsp;</p>

«Prezıdent Qasym-Jomart Toqaev 2021 jyly 11 maýsymda Úkimetke «elde órt qaýipsizdigin qamtamasyz etýdiń is-sharalary keshenin qabyldaýdy» tapsyrǵan. Bul keshendi iske asyrý 2024 jyly aıaqtalýǵa tıis, biraq sheshilmegen másele shash etekten. Aýyldy jerdegi halyq órtti sóndiretin eshqandaı arnaıy tehnıka joqtyǵyn aıtýda. Al aýdan ortalyǵynan kómek kelip jetkenshe órtengen nysannyń kúli de qalmaıdy. ıAǵnı, aýyldyq okýrgterde órtten qorǵanatyn eshqandaı múmkindik joq. Kerisinshe bul másele úlken qalalar men qala tıptes ortalyqtarda jaqsy sheshimin tapqan. Qala turǵandary órt qaýipsizdiginen qorǵalyp, al aýyl adamdary órtene bersin degen nıet emes shyǵar bul. Bárimiz bir eldiń azamaty, bir memlekettiń turǵyndarymyz, zań ortaq, sóıte tura aýyl turǵyndarynyń qaýipsizdik quqyn shekteýge eshqandaı negiz joq», - dedi Ú. Shapaq Májilistiń jalpy otyrysynda.

Foto: vıdeodan alynǵan kadr

Depýtattyń aıtýynsha, ótken jyly respýblıka kóleminde 11 805 órt oqıǵasy tirkelgen, onyń ishinde 5 991 órt qalalyq eldi mekenderde, 5 814 órt – aýyldyq jerlerde bolǵan. Saldarynan 375 adam (qalada 219, aýyldyq jerde 156 adam) qaıtys bolyp, materıaldyq shyǵyn kólemi 16 mlrd teńgeden asty.

«Qazirgi tańda elimizde 29 shaǵyn qala-kent, 6 293 aýyl bar. Olardyń órt qaýipsizidiginen saqtandyrý boıynsha tehnıkalyq múmkindikterine toqtalsaq, aýyldyq eldi mekenderdi órtten qorǵaýdy 231 órt sóndirý deposy, 705 órt sóndirý beketi jáne 209 erikti órtke qarsy quralymdar qamtamasyz etedi. Bir órt sóndirý beketine bir-birinen alshaq ornalasqan birneshe eldi meken qaraıdy. Órt sóndirýshiler josparlanǵan 20 mınýtta baqylaýdaǵy eldi mekenderge esh jete almaıdy. Mysaly, 2023 jyly bolǵan 719 jaǵdaıda órt sóndirýshiler tıisti nysanǵa jetý úshin kemi bir saǵat ýaqytyn jolǵa jumsaǵan», - dedi ol.

QR «Azamattyq qorǵaý týraly» zań talaptarynda jergilikti atqarýshy organdardyń eldi mekenderde órt sóndirý beketterin uıymdastyrý quzyreti bekitilgen.

«Bul quqyqtyq qujatqa jergilikti atqarýshy organdar nemquraıdy qaraıdy. Joǵaryda aıtylǵandardy eskere otyryp birinshi kezekte, respýblıka sheńberinde aıaqtalmaǵan órt sóndirý depolarynyń qurylysyn jedel aıaqtaý qajet. Órt sóndirý beketterin tolyqqandy zerdelep, zamanaýı tehnıkalyq qurylǵylarmen qamtamasyz etý kerek», - dedi depýtat.