Aýyldardyń kóbi úsh oblysta jabylǵan

<p>ASTANA. KAZINFORM &ndash; QR Ulttyq ekonomıka mınıstrligi 2023 jyly el óńirlerinde neshe aýyl jabylǵanyn málim etti.</p>

«Atap aıtqanda, «Qazaqstan Respýblıkasynyń ákimshilik-aýmaqtyq qurylysy týraly» Zańyna sáıkes, halqynyń sany 50 adamnan az sharýa qonystary men ózge de qonystar eń jaqyn mańdaǵy eldi mekenniń quramyna engiziledi. Sonymen qatar, jergilikti ókildi jáne atqarýshy organdar óz ókilettikteri sheginde ákimshilik aýmaqtardy qurý jáne taratý, olardyń shekaralaryn belgileý jáne ózgertý, olarǵa at qoıý men olardyń atyn ózgertý týraly sheshimder qabyldaıdy. Bul turǵyda 2023 jyly elimizde 39 aýyl qysqartyldy», - delingen Ulttyq ekonomıka mınıstrliginiń Kazinform agenttigine bergen jaýabynda.

Atalǵan 39 aýyldyń ishinde 25-i Qostanaı oblysyna tıesili. Munymen qosa Qaraǵandy oblysynda 7 aýyl, Batys Qazaqstan oblysynda 3 aýyl taratylǵan.

Budan buryn habarlanǵandaı, keıingi 10 jylda elimizde aýyldar sany 582-ge qysqardy.