Aýyldardyń 82 paıyzy taza aýyz sýmen qamtylǵan

<p>ASTANA. KAZINFORM &ndash; QR Sý resýrstary jáne ırrıgatsııa mınıstrligi taza aýyz sýǵa muqtaj eldi mekenderge qatysty túsinik berdi.</p>

«QR Sý Kodeksiniń 1-babynyń 13-2 jáne 30 tarmaqtaryna sáıkes, Mınıstrlik eldi mekender sheginen tys jerlerde sý qoryn paıdalaný jáne qorǵaý, sýmen jabdyqtaý, sý burý salasyndaǵy basqarý men baqylaý fýnktsııalaryn júzege asyratyn memlekettik organ. Al QR Ónerkásip jáne qurylys mınıstrligi jergilikti atqarýshy organdarmen birlesip, eldi mekender sheginde sýmen jabdyqtaý jáne sý burý salasyndaǵy basshylyqty jáne salaaralyq úılestirýdi júzege asyratyn ortalyq atqarýshy organ sanalady. Ónerkásip jáne qurylys mınıstrliginiń málimetishe, elimiz boıynsha 6232 aýyldy eldi mekenniń 5129-y nemese 82 paıyzy ortalyqtandyrylǵan aýyz sýmen qamtylǵan», - delingen Sý resýrstary mınıstrliginiń Kazinform agenttigine bergen jaýabynda.

Qalǵan 1103-in nemese 18% eldi mekendi ortalyqtandyrylǵan aýyz sýmen qamtamasyz etý boıynsha jaýapty mınıstrlik tarapynan jumystar atqarylyp jatyr.

«Sonymen qatar, respýblıka teńgeriminde jalpy 655 aýyldyq eldi mekendi nemese 1423 myń adamdy aýyz sýmen qamtamassyz etetin jalpy uzyndyǵy 15,2 myń km quraıtyn 41 toptyq sý qubyry bar. Atalǵan toptyq sý qubyrlarymen halyqqa aýyz sýdy jetkizý jáne tehnıkalyq jaǵdaıyn qadaǵalaý jumystaryn «Qazsýshar» jáne «Nura toptyq sý qubyry» respýblıkalyq memlekettik kásiporyndary iske asyrýda», - dep atalyp ótken vedomstvo aqparatynda.

Buǵan deıin QR Premer-Mınıstriniń orynbasary Tamara Dúısenova eki jylda búkil qazaqstandyq aýyz sýmen tolyq qamtylatynyn aıtqan edi.

Byltyr ókiletti organdar 2025 jyldyń sońyna deıin barlyq aýyldy aýyz sýmen qamtý máselesi sheshiletinin jarııalady.