Aýyldarda qar shyǵarý jumystary nazardan tys qalǵan – Premer-Mınıstr sý tasqyny týraly

<p>ASTANA. KAZINFORM &ndash; QR Premer-Mınıstri Oljas Bektenov óńirlerde sý tasqynyna qarsy is-sharalar tıisti deńgeıde oryndalmaǵanyn, ásirese qar shyǵarý jumystary aýyldarda júrgizilmeıtinin aıtty.</p>

«Buǵan deıin óńirlerde sý tasqynyna qarsy barlyq is-sharalardy sapaly iske asyrý qajettigi týraly birneshe ret tapsyrma berilgen bolatyn. Alaıda, memlekettik organdar men ákimdikter tıisti sharalardy tolyq kólemde qabyldaǵan joq. Nátıjesinde 218 is-sharanyń 92-si osy ýaqytqa deıin oryndalmaı otyr. Jumysqa bulaısha selqos qaraýǵa bolmaıdy», - dedi Premer-Mınıstr Úkimettiń búgingi otyrysynda.

Oljas Tótenshe jaǵdaılar mınıstrine josparlanǵan is-sharalardyń oryndalmaýyna jol bergen laýazymdy tulǵalarynyń jaýapkershiligi týraly usynystar engizýdi tapsyrdy.

«Bıyl kóktemde tasqyn qaýpi joǵary bolyp otyr. Qalyń qar men jańbyr da qaýipti arttyra túsedi. Bul rette jekelegen óńirlerde qar shyǵarýǵa arnalǵan qarajat tek iri qalalar men oblys ortalyqtaryna bólinedi. Al aýyldyq eldi mekenderde qar shyǵarý jumystary nazardan tys qalǵan. Mysaly, Pavlodar oblysynda qar shyǵarýǵa bólingen 4,5 mlrd teńgeniń 900 mln teńgesi ǵana aýyldyq jerlerge kózdelgen. Qaraǵandy oblysynda 5,4 mlrd teńgeniń 700 mln teńgesi, Aqtóbe oblysynda – nebári 100 mln teńge aýyldarǵa arnalǵan. Óńir ákimderi qardy, ásirese aýyldyq jerlerde ýaqytyly shyǵarý úshin shara qabyldaýy qajet», - dedi O.Bektenov.

Sonymen birge, eldi mekender kóshelerin sý basyp qalý jáne joldardy shaıyp ketý faktileri qazirdiń ózinde tirkelip otyr. Jalpy 217 eldi mekende tasqyn qaýpi saqtalyp otyr.

«Mundaı problema eldi mekenderdiń kópshiliginde jyldan-jylǵa qaıtalanyp keledi. Mysaly, Qostanaı oblysyndaǵy Qaramyrza aýyly sońǵy 4 jyl boıy qar sýynyń qursaýynan shyǵa almaı otyr. Bıyl da qaýip tónýde. Joldardyń sý basyp qalýyna baılanysty Aqmola oblysynda ıAgodnoe, Qostanaı oblysynda Ekidiń, Aqtóbe oblysyndaǵy Oımaýyt, Jaryq, Ótek jáne Qumtoǵaı aýyldarymen jyl saıyn qatynas úziledi. Ákimdikter bul problemalardy bile tura, esh shara qabyldamaıdy. Biraz sharýa ákimdikterdiń naqty jumysyna baılanysty», - dedi Úkimet basshysy.

Sondaı-aq aryqtardy, jaýyn-shashyn kárizderin ýaqytyly tazartý, ýaqytsha bógetter salý jáne eldi mekenderde topyraq úıindilerimen bekitý jumystary júrgizilýi qajet. Jergilikti bıýdjetterde bolýy yqtımal tótenshe jaǵdaılarǵa arnalǵan qarajat kózdelýi kerek.