Aýyldarda adam sanyn saqtap qalý – strategııalyq maqsat – Senat tóraǵasy
«Jalpy, qazir Qazaqstanda halyq sanynyń ósý qarqyny kóńil qýantady. Byltyr qarasha aıynda elimizde halyq sany 20 mıllıonǵa jetkeni belgili. Shyn máninde, demografııalyq ósý – eldiń básekege qabilettiligin arttyrýdyń negizgi tetigi. Osyǵan oraı Prezıdentimizdiń tapsyrmalaryn oryndaý aıasynda Kóshi-qon saıasaty jáne Aýyldyq aýmaqtardy damytý tujyrymdamalary qabyldandy. Bul qujattar eńbek mobıldiligin damytýǵa, sapaly ınfraqurylymdy qalyptastyrýǵa jáne azamattardyń ómir súrý deńgeıin arttyrýǵa baǵyttalyp otyr. Sondaı-aq, 2029 jylǵa deıingi Ulttyq damý josparynyń jobasyna da birqatar naqty sharalar engizildi. Endi memlekettik josparlaýdyń jańa júıesi aıasynda olardyń sapaly iske asyrylýyn qamtamasyz etý qajet», - dedi M.Áshimbaev.
Senat tóraǵasy qarqyndy demografııalyq ósý áleýeti zor múmkindikterge jol ashatynyn atap ótti.
«Elimizde halyq sanynyń úshten biri jastar. Ortasha jas deńgeıi – 32 jas. Qazirgi tańda memleket bala týýdy yntalandyrýǵa arnalǵan áleýmettik mindettemelerdi josparly túrde iske asyryp keledi. Kópbalaly otbasylarǵa aı saıynǵy járdemaqylar men arnaıy járdemaqylar da tólenedi. Prezıdentimizdiń tapsyrmasy boıynsha bıyl «Ulttyq qor – balalarǵa» baǵdarlamasy iske asyryla bastady. Halyq sany ósken saıyn tıisti deńgeıde orta jáne joǵary bilim berý, sondaı-aq, medıtsına júıesin damytý qajet ekeni túsinikti. Ýaqyt ótken saıyn bizdiń azamattardyń ómir súrý uzaqtyǵy da artyp keledi. Bul da oń úrdisterdiń biri. Ulttyq statıstıkanyń derekterine sáıkes, 1991 jyldan bastap ómir súrý uzaqtyǵy 6,8 jylǵa artqan. 2022 jyldyń qorytyndysy boıynsha bul kórsetkish 74,4 jas boldy», - dedi ol.
Onyń paıymynsha, osyndaı ózgerister elimizdegi zeınetaqy júıesine, jalpy, áleýmettik qamsyzdandyrý salasyna da áser etetini anyq.
«Demografııaǵa qatysty taǵy bir mańyzdy úrdis ýrbanızatsııa ekeni belgili. Ulttyq statıstıkanyń málimetteri boıynsha, qazirdiń ózinde qala halqynyń úlesi 62 paıyzǵa jetken. Alaıda Qazaqstandaǵy ýrbanızatsııa deńgeıi jan basyna shaqqandaǵy kiris kólemi uqsas elderden shamamen 10 paıyzǵa qalyp keledi. Birikken Ulttar Uıymy orta merzimdi ýaqytta Ortalyq Azııa óńirinde qala halqynyń ósýi jalǵasa beredi dep boljap otyr. Árıne, bul úrdis qalalarda jumyspen qamtýdyń jáne baspananyń qoljetimdiligin qamtamasyz etýdiń ózektiligin arttyra túsedi. Sonymen qatar aýyldyq aýmaqtardy da damytýdy umytpaýymyz kerek. Aýyldarda adam sanyn saqtap qalý da – strategııalyq maqsat. Osy turǵydan kelgen kezde, «Aýyl amanaty» baǵdarlamasy óziniń tıimdiligin kórsetti. Shaǵyn nesıelerdiń arqasynda aýylda 12 myńnan astam jumys orny ashyldy», - dedi Máýlen Áshimbaev.