Aýylda jumys isteıtin dárigerler 10 mln teńge tólem alady — Atyraý

<p>ASTANA. KAZINFORM — Atyraý oblysynda aýdan jáne aýylǵa baryp jumys isteıtin dáriger mamandarǵa bir rettik qarjylaı kómek kórsetildi. Tolyǵyraq óńir ákimi Serik Shápkenov aıtyp berdi.</p>

— «Aýyldyq densaýlyq saqtaýdy jańǵyrtý» ulttyq jobasy aıasynda 4 medıtsınalyq ǵımaratty paıdalanýǵa berdik. Jyl aıaǵyna deıin 12 nysannyń qurylysyn aıaqtap, halyq ıgiligine beremiz. Keler jyly taǵy 2 medıtsınalyq obekti ashylady. Odan bólek bıyl jergilikti bıýdjet esebinen 7 densaýlyq saqtaý nysany tapsyryldy. Bul sharalar ásirese, oblys ortalyǵynan alys ornalasqan eldi meken turǵyndaryna medıtsınalyq qoljetimdilikti arttyrady. Óńirde jıi talqyǵa túsetin taqyryptyń biri — dáriger tapshylyǵy. Biz ózge óńirden bilikti jáne oqýyn endi aıaqtaǵan jas mamandardy tartyp jatyrmyz. Olarǵa bir rettik ústemaqy taǵaıyndadyq, — dedi Serik Shápkenov oblystyń bıylǵy áleýmettik-ekonomıkalyq damýy týraly esep bere turyp.

Ákimniń málimetinshe, aýyl dárigerlerine beriletin bir rettik kómektiń kólemi ótken jylmen salystyrǵanda 2 ese artty.

— Aýylǵa baryp jumys isteýge kelisken dárigerge 10 mln teńge, aýdan ortalyǵynda qyzmet etemin degenderge 8,5 mln teńge tólendi. Al, oblys ortalyǵynda eńbek etkisi kelse 5 mln teńge kóleminde kómek kórsetildi. Jalpy bıyl óńirde 140 dáriger jumysqa qabyldandy. Oǵan qosa oblys dárigerlerine arnalǵan óńirlik biregeı turǵyn úı baǵdarlamasy arqyly 42 dáriger baspanaly boldy, sondaı-aq 105 qyzmettik páter satyp alyndy. Bıyl densaýlyq saqtaý salasyn medıtsınalyq jabdyqtarǵa jergilikti bıýdjetten 5,1 mıllıard teńge bólindi, sonyń işinde medıtsınalyq uıymdarǵa 45 sanıtarlyq kólik satyp aldyq, — deıdi ol.

Buǵan deıin Serik Shápkenov óńirdegi Sibir jarasynyń taralý jaǵdaıyna qatysty túsinik berdi.