Aýyl sharýashylyǵynda kooperatsııany damytý tym baıaý júrip jatyr – senator
«Qazir Qazaqstanda 3248 aýyl sharýashylyǵy kooperatıvi tirkelgen, onyń 1255-i mal sharýashylyǵymen, 322-si ósimdik sharýashylyǵymen, 1671-i basqa baǵyttar boıynsha jumys istep jatyr. Bıyl «Agrarlyq nesıe korporatsııasy» AQ arqyly 543 aýyl sharýashylyǵy kooperatsııalaryna 370 mlrd teńge qarjy bólingenin eskersek, ár kooperatıv orta eseppen 680 mln teńgege qarjylandyrylǵanyn kóremiz, ıaǵnı kooperatsııany birigip, iriletý qashan da tıimdi. Al qalǵan 2700-den astam usaq sharýashylyqtardyń tek 3% ǵana jeńildetilgen nesıe alýǵa shamasy kelgen», – dedi Á. Bektaev «Elimizdiń óńirlerindegi aýyl sharýashylyǵy kooperatsııasynyń jaı-kúıi jáne sharýa qojalyqtaryn irilendirý» taqyrybyndaǵy otyrysta.
Senatordyń aıtýynsha, naryqty damytý jaǵdaıynda agrokooperatıvterdi qurý ózekti bolǵanymen, biraq osy kooperatsııany damytý tym baıaý júrip jatyr.
«Bul turǵyda mamandar osy saladaǵy negizgi problemalardy belgilep shyqty. Aýyl sharýashylyǵy kooperatıvterin qurýda adamdardyń bul ınstıtýtqa senimsizdigi baqalǵan. Sonymen qatar otandyq ónimniń básekege qabiletiniń tómendigi máselesi de bar. Kooperatıvti tirkeý kezindegi qujattardyń kóptigi kedergi jasap otyr. «Aýyl sharýashylyǵy kooperatıvteri týraly» Zań talaptarynyń kemshiliginen zaman talabyna saı tıisti ózgeristerdi qabyldaý qajet. Ónimdi daıyndaý, saqtaý, bastapqy óńdeý jáne naryqqa shyǵarýdyń damymaǵandyǵy, saqtaý qoımalarynyń bolmaýy, ónimdi tasymaldaý logıstıkasynyń nasharlyǵy osy salaǵa keri áser etip otyr», – dedi depýtat.
Álı Bektaevtyń paıymynsha, aýyl halqynyń «osy kooperatıvterdi qurýdyń qandaı artyqshylyqtary men paıdasy bar?» degen suraqtaryna naqty jaýap berilmeı jatyr.