Aýyl sharýashylyǵyn sýbsıdııalaýdaǵy zańsyzdyq: jalǵan aqparat usynǵandar anyqtalyp jatyr

<p>ASTANA. KAZINFORM &ndash; Sýbsıdııaǵa qatysty 4 derek boıynsha materıaldar quqyq qorǵaý organdaryna jiberiledi. Bul týraly Májilistiń jalpy otyrysynda aýyl sharýashylyǵyndaǵy sýbsıdııanyń tıimdiligine qatysty aýdıt qorytyndysyn jarııalaý kezinde Joǵary aýdıtorlyq palatanyń tóraǵasy Álıhan Smaıylov málim etti.</p>

— Jalpy aýdıt nátıjeleri boıynsha 142 mlrd teńge bıýdjet qarajatynyń tıimsiz josparlanǵany jáne paıdalanylǵany, 2 mlrd teńgege qarjy salasyndaǵy talaptardy buzý derekteri anyqtaldy. Ekonomıkalyq shyǵyndar men jiberip alǵan paıda shamamen 5 mlrd teńgeni qurady. Bıýdjetke 2 mlrd teńge óteldi jáne qalpyna keltirildi. 4 fakt boıynsha materıaldar quqyq qorǵaý organdaryna jiberiledi. 322 materıal ákimshilik jaýapkershilikke tartý úshin jiberildi, — dedi Á. Smaıylov.

Onyń aıtýynsha, tergeý organdaryna jiberiletin derekter kóbine ońtústik óńirler men Ulytaý oblysynda bolǵan jaǵdaıǵa qatysty.

— 1 myńǵa jýyq adam 1,5 mlrd teńgege sýbsıdııa rásimdegen, ıaǵnı kásipkerlik isine alǵan. Alaıda salyq organdarynda kásipker retinde tirkelmegen. Túrkistan oblysynda 15 sýbekti 225 mln teńgege is júzinde joq ınvestıtsııaǵa sýbsıdııa alǵan. Bul turǵyda jalǵan shot-faktýra máselesi bar. Al Abaı oblysynda eki kásiporyn satyp alynbaǵan aýyl sharýashylyǵy tehnıkasyna 131 mln teńge sýbsıdııa tartqan, ıaǵnı jalǵan aqparatty usynǵan. Sonymen qatar, Aýyl sharýashylyǵy mınıstrligi men óńirlerdegi basqarmalardyń 8 laýazymdy qyzmetkerin ákimshilik jaýapkershilikke tartyp otyrmyz. Odan basqa ákimshilik jaýapkershilikke tartylatyn taǵy 320 adam bar, — dep naqtylady aýdıtorlyq palatanyń tóraǵasy.

Buǵan deıin Á. Smaıylov sýbsıdııa alǵandardyń 3 myńy agroónerkásip kesheniniń sýbektisi bolmaı shyqqanyn aıtty.