Aýyl sharýashylyǵy: keler jyly jeńildetilgen qarjylandyrý kólemi 900 mlrd teńgege jetpek

<p>ASTANA. KAZINFORM &ndash; Keler jyly aýyl sharýashylyǵyn jeńildetilgen qarjylandyrý kólemi 900 mlrd teńgege jetpek. Bul týraly QR Aýyl sharýashylyǵy vıtse-mınıstri Azat Sultanov málimdedi.</p>

«Memleket basshysynyń aýyl sharýashylyǵyn jeńildetilgen qarjylandyrý kólemin birneshe ese ulǵaıtý jónindegi tapsyrmasyna sáıkes, salany qarjylandyrýdyń jańa tásilderin kelesi jyly da jalǵastyrýdy josparlap otyrmyz.

Máselen, kelesi jyly jeńildetilgen qarjylandyrý kólemin 900 mlrd teńgege deıin jetkizý josparlanyp otyr. Bul fermerlerge aýylsharýashylyq tsıklynyń barlyq kezeńinde, daıyndyqtan bastap egin jınaýǵa deıin qoldaý kórsetedi. Bólingen somanyń alǵashqy 100 mlrd teńgesi osy jyldyń jeltoqsan aıynda fermerlerge qoljetimdi bolady. Bul kóktemgi egis jumystaryna ýaqytyly daıyndyqty qamtamasyz etedi jáne jańa maýsymdy kidirissiz bastaýǵa múmkindik beredi», - dedi Azat Sultanov «Atameken» UKP sezi aldyndaǵy jıynda.

Sondaı-aq, vıtse-mınıstr Memleket basshysynyń aýyl sharýashylyǵy tehnıkasyn jańartý deńgeıin jylyna 8-10%-ǵa deıin jetkizý jónindegi tapsyrmasyn oryndaý úshin aýyl sharýashylyǵy tehnıkasynyń lızıngine keminde 200 mlrd teńge bólý máselesi pysyqtalyp jatqanyn atap ótti.

Aıta keteıik, Astanada «Atameken» QR Ulttyq kásipkerler palatasynyń XII Sezi ótti. Onda elimizdiń túkpir-túkpirinen kelgen sharýalardyń túıtkildi máseleleri talqylandy.