«Aýyl» partııasy keler saılaýda Májilistegi mandatyn kóbeıtýge tyrysady — Serik Egizbaev

<p>«Aýyl» partııasy keler saılaýda Májilistegi depýtattyq mandatyn kem degende eki ese arttyrýǵa talpynady. Bul týraly Jibek Joly telearnasynyń «Ýáde» baǵdarlamasyna suhbat bergen «Aýyl» HDPP tóraǵasy, Májilis depýtaty, fraktsııa jetekshisi Serik Egizbaev aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Biz saıası kúsh retinde bıylǵy saılaýda Parlament Májilisine óttik. Parlamenttiń negizgi maqsaty — qoǵamǵa kerek ári elimizdiń damýyna qatysty zańdardy qabyldaý. Májiliste 7 komıtet bar. Osy komıtterdiń barlyǵynda „Aýyl“ partııasynyń ókilderi bar. ıAǵnı, Májilistegi bizdiń fraktsııa quramyndaǵy 8 depýtat palata komıtetterinde belsendi jumys istep júr. Qazir 70-ke jýyq zań jobasy qaralyp jatsa, barlyq qujattarda bizdiń partııanyń úlesi bar dep aıtýǵa bolady. Qoǵam zań talaptary qatań saqtalǵan jaǵdaıda damıdy», — deıdi S. Egizbaev. 

Aıta keteıik, «Aýyl» partııasynyń bıylǵy saılaý qorytyndysy boıynsha Májiliste 8 depýtattyq mandaty bar.

«Jańa múmkindikti qalaı paıdalanýymyz kerek? Saılaýshylarǵa Parlamenttegi fraktsııamyzdyń belsendi jumysyn kórsetýimiz kerek. Ár fraktsııaǵa partııasy qoldaý jasaýǵa tıis. „Aýyl“ partııasynyń jıyrma óńirlik fılıaly bar. Olarmen kúndelikti turaqty baılanysta otyramyz. Oblystarda kóterilip jatqan kúrdeli máselelerdi nazardan tys qaldyrmaı, saraptap jatyrmyz. Osy máselelerdi Parlamentte kóteremiz. Qazir Parlament Májilisinde 8 depýtattyq mandatymyz bolsa, keler saılaýda ony kem degende 16-ǵa jetkizýimiz kerek. Jalpy, budan da kóp mandat alýǵa tyrysamyz», — dedi «Aýyl» HDPP tóraǵasy.