Aýyl dárigerlerine 9 mln teńgege jýyq kótermeaqy beriledi – Ashat Aımaǵambetov

<p>ASTANA. KAZINFORM &ndash; Aýylǵa jumysqa baratyn dárigerlerge eń tómengi jalaqynyń 100 ese kóleminde (shamamen 9 mln teńgege jýyq) bir rettik kótermeaqy beriledi. Bul týraly Májilis depýtaty Ashat Aımaǵambetov aıtyp berdi.</p>

Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» Zańy qabyldandy.

«Aýyldaǵy dárigerler jetispeýshiligi máselesin sheshý boıynsha AMANAT partııasy bergen ýádesin oryndadyq. Endi osy dárigerler 9 mıllıon teńgege jýyq qarajatty bir mezgil kótermeaqy retinde alady. Bul aýyldaǵy dárigerlerdiń jetispeýshiligi máselesin sheshýge óte mańyzdy bolady. Bul rette dáriger 5 jyl sol jerde jumys isteýi kerek. Bizdegi basty másele – aýylǵa myqty mamandardy ákelý jáne soǵan yntalandyrý. Qazirdiń ózinde óz mamandyǵynda 3 jyl isteý talaby bar. Eń tómengi jalaqy mólsheri de jyl saıyn arta beredi. Sondyqtan, dárigerlerge aıtarymyz, birrettik aqyny alǵan soń, sol aýylda jumys istep, ornyǵýy kerek», - dedi A.Aımaǵambetov Májilis kýlýarynda tilshilerge bergen suhbatynda.

Sondaı-aq, medıtsına qyzmetkerleriniń mártebesin arttyrý maqsatynda «Úzdik maman» respýblıkalyq konkýrsynyń jeńimpazdaryna birjolǵy 500 AEK tólenedi.

Densaýlyq saqtaýdy damytýdaǵy jetistikteri men erekshe eńbegi úshin "Qazaqstan Respýblıkasynyń eńbek sińirgen dárigeri" qurmetti ataǵy berilip, 1000 AEK tólem tólenedi.