«Aýyl amanaty»: Jetisý oblysynyń turǵyndary nesıesin ala almaı júr

<p>TALDYQORǴAN.KAZINFORM-&nbsp;&nbsp; Byltyr Jetisý oblysynda bir ǵana aýyl sharýashylyǵy baǵytynda 342 joba maquldanǵan.&nbsp; Alaıda aýyl turǵyndary&nbsp;&nbsp; kóktemnen beri 2,5 paıyzben beriletin nesıelerin ala almaı júr.&nbsp; Al jaýapty basshylar respýblıkalyq bıýdjetten qarjynyń qashan bólinetinin bilmeıdi.</p>

Búgin Jetisý oblysy ákimdigine qala mańynan jáne shalǵaı eldi mekenderden 30-ǵa jýyq azamat kelip, shaǵymyn aıtty. Basty máseleleri «Aýyl amanaty» baǵdarlamasy boıynsha 2,5 paıyzdyq nesıege ótinim ótkizip, 6-7 aıdan beri aqshalaryn ala almaı júr. Jeke kásipker retinde tirkelip, shot ashyp qoıǵan azamattar qarjynyń ýaqytyly túspeı, kásipterin bastaı almaı otyrǵanyna narazy. 

Foto: Aıbek Quttybek/Kazinform

- Sút, et ónimderin shyǵaryp, kásip jasaý úshin 2024 jyly naýryzda qujattarymdy jınap, ótkizdim. Bári daıyn tur. 7-8 aı boldy júrgenimizge. JK ashtym, jeke shot ashtym. Saqtandyrýǵa aı saıyn aqsha tólep otyrmyn. Kepilge úıdi qoıý úshin baǵalaıtyndarǵa aqsha jumsadyq. Ózim Aqtóbede jumys isteımin. Sodan suranyp keldim. Aqsha tıse, alysqa sabylmaı, kásibimdi bastaıyn, halyqqa paıdam tısin dep. Ákimniń orynbasaryna jolyqtyq. Kútesińder deıdi. Aqshanyń naqty qashan túsetini belgisiz, - dedi Erkin aýylynyń turǵyny Batyrhan Qaısar.

Bıznes josparlaryn ótken jylǵy kóktemdegi baǵamen ótkizgender odan beri maldyń quny artqanyna alańdap otyr. 

Foto: Aıbek Quttybek/Kazinform

- Osy baǵdarlamaǵa ótken jyly kóktemnen beri shapqylap, kólikke qona júrip, qujat jınap ótkizgenbiz. Qora-jaıdy ózimiz daıyndadyq. Úkimet iri- qaraǵa 260-270 myń teńgeden berse, kásip bastaımyz degenbiz. Ol maldardyń quny qazir 350 myńnan asty. Ony qalaı esepteıdi? Aqsha qolymyzǵa áli túsken joq. Sharýalardyń arasynda Úkimet berse, sol aqshamen jabamyn dep qaryzdanyp otyrǵandar da bar shyǵar. 6-7 aı boldy júrmiz, mine, - dedi Taldyqorǵan qalasynyń turǵyny Kúlbaq Qadylbaı.

Oblys ortalyǵynan shalǵaı jatqan Alakól, Panfılov aýdandary men Qaratal, Aqsý, Kóksý óńirlerinen kelgen azamattardyń shaǵymyna Aýyl sharýashylyq basqarmasynyń ókilderi jaýap berdi.

- «Aýyl amanaty» baǵdarlamasy boıynsha, 2024 jylǵa 342 ótinim 2,6 mlrd teńgege qabyldanǵan. Biraq bul ótinimderge respýblıkalyq bıýdjetten qarjy bólinbeýine baılanysty aqsha tólengen joq. Kútip otyrmyz. 2024 jylǵy qabyldanǵan ótinimder osy jylmen qarastyrylady. Bıýdjetten aqsha qashan bólinedi, ony naqty aıta almaımyz, - dedi Jetisý oblysy Aýyl sharýashylyq basqarmasy agroónerkásip keshenderin nesıeleý bóliminiń basshysy Ersin Tarybaev.

Aq qar, kók muzda aýyl-aýyldan oblys ortalyǵyna jınalǵan azamattar qarajatymyz tezirek qolymyzǵa tıse, elge de paıdamyz tıer edi, - deıdi.

Eske salaıyq osyǵan deıin Taldyqorǵanda DamuBala-ǵa qatysty daý shyqqanyn jazǵanbyz.