«Aýyl amanaty» baǵdarlamasyna qatysýǵa ótinim berý jeńildeıdi

<p>ASTANA. KAZINFORM &mdash; &laquo;Aýyl amanaty&raquo; baǵdarlamasyna qatysýǵa nıet bildirgen azamattar úshin elektrondy aqparattyq júıe ázirlenip jatyr. Portal jeńildetilgen nesıe alyp, kásip ashýdy kózdegen adamǵa tıisti ótinimdi úıden shyqpaı-aq, qashyqtan berýge múmkindik berip otyr. Júıe jobasy QR Premer-Mınıstriniń orynbasary Tamara Dúısenovanyń tóraǵalyǵymen ótken keńeste tanystyryldy. Bul týraly Primeminister.kz. jazdy.&nbsp;</p>

Aýyl turǵyndarynyń tabysyn arttyrýǵa baǵyttalǵan baǵdarlamaǵa qatysýshylarǵa jeńildetilgen nesıe berý úrdisin óńirlerdegi áleýmettik-kásipkerlik korporatsııalar úılestirip otyr. Olardyń keńseleri oblys ortalyqtarynda ornalasqan. Bul rette shalǵaı jatqan aýyldardan kelip, ótinim berý yńǵaısyzdyq týdyrady. Aýyl sharýashylyǵy vıtse-mınıstri Baǵlan Bekbaýovtyń sózinshe, ázirlenip jatqan portal ótinimdi qabyldap qana qoımaı onyń qarastyrý kezeńderin qashyqtan baqylap otyrýǵa múmkindik bermek.

«Ótinim berýshi júıege elektrondy qoltańbasy arqyly tirkelip, baǵdarlamaǵa qatysýǵa qajetti málimetter men qujattardy júkteıdi. Qoldanýshynyń ruqsatymen onyń jeke derekteri tekserilip, bazalarda bar keı málimetter avtomatty túrde engiziledi. Áleýmettik-kásipkerlik korporatsııalarda ótinim birneshe satyda qarastyrylady. «Aýyl amanaty» arqyly nesıe alýǵa nıetti azamat jeke kabıneti arqyly qujattar naqty qaı mamannyń qaraýynda turǵanyn kóre alady», — dedi Baǵlan Bekbaýov.

Elektrondy júıeni Jambyl oblysynda pılottyq rejımde engizý kózdelip otyr.

«Baǵdarlamaǵa qatysýshylar úshin barynsha yńǵaıly jaǵdaı jasaý mańyzdy. Aqparattyq júıeniń ózge de qajetti málimetter bazalarymen ıntegratsııalanýyn jiti qadaǵalaý kerek. Bizdiń túpkilikti maqsatymyz aýyl turǵyndarynyń tabysyn arttyrý ekenin esten shyǵarmaý qajet. Sondyqtan beriletin nesıeler aýyldardaǵy aǵaıynnyń turaqty tabysqa qol jetkizýine yqpal etýi tıis. «Aýyl amanaty» baǵdarlamasy arqyly kásip ashqan nemese jumysqa ornalasqandar týraly derekter tıisti bazalar arqyly tekserilip otyrady. Sondyqtan aımaqtar baǵdarlamanyń nátıjeli júzege asýyn qatań baqylaýy shart», — dep atap ótti Tamara Dúısenova.