«Aýyl amanaty»: Atyraýda byltyr 1,5 mlrd teńgeniń 192 jobasy qarjylandyrylǵan

<p>ATYRAÝ. KAZINFORM &mdash; Atyraý oblysynda byltyr &laquo;Aýyl amanaty&raquo; jobasymen 192 jobaǵa bólingen 1,5 mlrd teńge ıgerilgen.&nbsp;</p>

Máselen, Qurmanǵazy aýdanynda 36, Inderde — 35, Mahambet aýdanynan 30 joba maquldanǵan. Maqat aýdanynda 8, Isataı aýdanynda 13 joba usynylǵan. Atyraý qalasynda 150,9 mln teńgeniń 18 jobasyna qarjy berilgen. 

Atyraý oblystyq aýyl sharýashylyǵy basqarmasynyń bólim basshysy Tilekqabyl Ǵubaıdýllınniń aıtýynsha, ár okrýgte skrınıng júrgizdik.

«Byltyr Atyraý oblysyndaǵy 68 okrýg týraly aqparatty Aýyl sharýashylyǵy mınıstrligine joldadyq. Bıyl «Aýyl amanaty» jobasymen qarjylandyrý 61 okrýgke berilip otyr. Alaıda, Atyraý qalasynyń mańyndaǵy aýyldyq aýmaqtar bul tizbege kirmeı qaldy. Mınıstrlik bul sheshimniń QR Ákimshilik aýmaqtyq bólinis týraly zańy sheńberinde qabyldanǵanyn túsindirdi. Óıtkeni joǵaryda atalǵan joba aýyldyq aýmaqtarǵa arnalǵan. Qazir 61 okrýg boıynsha 83 joba anyqtaldy. Bul jobalarǵa 760 mln teńgeden astam qarajat bólindi», - deıdi Tilekqabyl Ǵubaıdýllın.

Onyń málimetinshe, atalǵan jobany iske asyrý úshin 900 mln teńge somasyna qosymsha bıýdjettik ótinim berilgen. 

Eske sala ketelik, buǵan deıin Atyraý oblysynda 2 myń 216 kásiporyn jumyssyzdardy kvota arqyly jumysqa qabyldaıtynyn jazǵan edik.