«Aýyl amanaty»: 16 myńǵa jýyq jańa jumys orny ashyldy

<p>ASTANA. KAZINFORM &ndash; Memleket basshysy Qasym-Jomart Toqaev aýyl sharýashylyǵy qyzmetkerleriniń birinshi forýmynda aýyldardy qoldaý baǵytynda atqarylǵan jumystarǵa toqtaldy.</p>

«Meniń tapsyrmammen Úkimet bes jyldy qamtıtyn tujyrymdama qabyldady. «Aýyl – el besigi» baǵdarlamasy ázirlenip, júzege asyrylyp jatyr. Qazirdiń ózinde naqty nátıje bar. Bıyl 200-ge jýyq aýylǵa sý qubyryn tartý úshin qarjy bólindi. Jyl sońyna deıin aýyl halqynyń 95 paıyzdan astamy taza sýmen qamtamasyz etiledi», - dedi Memleket basshysy.

Prezıdenttiń sózinshe, aýyldaǵy densaýlyq saqtaý júıesin jańǵyrtý úshin 140-tan astam nysan salynǵan. Al «Jaıly mektep» ulttyq jobasy aıasynda bıyl 13 aýyl mektebi paıdalanýǵa berilgen.

«Sońǵy bes jylda jergilikti mańyzy bar 38 myń shaqyrym jol jóndeldi. Mańyzdy mindettiń biri – aýyl halqynyń tabysyn arttyrý. «Aýyl amanaty» baǵdarlamasy arqyly jyldyq ósimi 2,5 paıyz bolatyn shaǵyn nesıe berile bastady. Sonyń nátıjesinde aýylda 16 myńǵa jýyq jańa jumys orny ashyldy. Osyndaı aýqymdy jumys jalǵasyn tabady. Sebebi aýyldy kórkeıtý – strategııalyq mindet. Buryn jabylyp qalǵan keıbir aýdandar byltyr meniń tapsyrmammen qaıta quryldy. Bul – ásirese, shetkeri ornalasqan eldi mekenderge serpin beretin qadam», - dedi Memleket basshysy.