Aýyl ákiminiń fýnktsıonaldyq blogy keńeıtiledi
«Aýyldyq okrýgteri problemalyq máselelerdi sheshý úshin aýyldyq okrýg ákimi «Jergilikti memlekettik basqarý jáne ózin-ózi basqarý týraly» Qazaqstan Respýblıkasy Zańyna sáıkes mynadaı quzyrettermen qamtylǵan: kommýnaldyq turǵyn úı qorynyń saqtalýyn, sondaı-aq avtomobıl joldarynyń salynýyn, qaıta jańartylýyn, jóndelýin jáne kútip ustalýyn qamtamasyz etý; qoǵamdyq jumystardy, jastar praktıkasyn jáne áleýmettik jumys oryndaryn uıymdastyrý; eldi mekenderdi sýmen jabdyqtaýdy uıymdastyrý jáne sý paıdalaný máselelerin retteý; eldi mekenderdi abattandyrý, jaryqtandyrý, kógaldandyrý jáne sanıtarlyq tazartý jónindegi jumystardy uıymdastyrý. Buǵan qosa, aldaǵy ýaqytta aýyl ákiminiń fýnktsıonaldyq blogyn keńeıtý josparlanýda», - dep atap ótken Úkimet basshysy jaýabynda.
Onyń dereginshe, aýyl ákimderine kórme-jármeńke qyzmetin uıymdastyrýdy júzege asyrý, qoǵamdyq oryndardy syrtqy bezendirý máselelerin sheshý, jaıylymdardy basqarý jáne olardy paıdalaný jónindegi jospardyń iske asyrylýyn qamtamasyz etý jáne basqa da quzyrettilik túrlerin berý kózdelip otyr.
«Sonymen qatar 2020 jyldan bastap barlyq aýdandyq mańyzy bar qalalarda, aýyldarda, kentterde jáne aýyldyq okrýgterde derbes bıýdjet iske qosyla bastady. Búgingi kúni aýyldyq okrýgterdiń kiristeri salyqtyq, salyqtyq emes túsimderden, negizgi kapıtaldy satýdan túsetin túsimderden, aıyppuldar men aýdandyq bıýdjetten beriletin transferttenden qalyptastyrylady. 2022 jyly bıýdjettiń IV deńgeıiniń jalpy shyǵystary – 222 mlrd teńgeni qurap, onyń ishinde shyǵystardyń negizgi baǵyttary ákim apparatynyń qyzmetin qamtamasyz etý, abattandyrý, jaryqtandyrý jáne taǵy basqalaryna baǵyttalǵan bolatyn», - dedi Álıhan Smaıylov.
Premer-Mınıstr munan bólek zańnamany odan ári jetildirý aıasynda IV bıýdjet deńgeıine jeke jáne zańdy tulǵalardyń, jeke kásipkerlerdiń múlik salyǵyn, jekelegen qyzmet túrlerimen aınalysýǵa arnalǵan lıtsenzııalardy paıdalanǵany úshin tólemdi, jekelegen qyzmet túrlerimen aınalysý quqyǵy úshin lıtsenzııalyq alymdy, sý resýrstaryn paıdalanǵany úshin tólemdi qosymsha berý usynylatynyn aıtady.
«Salyqtar men tólemderdiń osy túrlerinen túsetin túsimderdi eskere otyryp, IV bıýdjet deńgeıiniń menshikti kiristeriniń 3 esege ulǵaıýy kútilýde. Sondaı-aq aldaǵy ýaqytta ekonomıkalyq jaǵdaıǵa súıene otyryp, zańnamany odan ári jetildirý aıasynda IV bıýdjet deńgeıine qosymsha salyq kózderin berý josparlanýda», - dedi ol.