Aýǵanstanǵa júzdegen sheteldik ınvestor qyzyǵýshylyq tanytyp otyr – Nýrıddın Azızı

ASTANA. QazAqparat – Aýǵanstanda jeke sektorǵa salyq jeńildikteri berilip, sheteldik ınvestorlar shaqyrylyp jatyr. Bul týraly Aýǵanstannyń ónerkásip jáne saýda mınıstri Nýrıddın Azızı aıtty, dep habarlaıdy QazAqparat tilshisi.

«Aýǵanstannyń aımaqtaǵy mańyzdy ónerkásiptik ortalyqtardyń biri bolý múmkindigi baryn jaqsy bilesizder. Aýǵanstan ıslam ámirligi sheteldik ınvestorlarǵa, ásirese Qazaqstannan jáne óńirdiń basqa elderinen kelgen kásipkerlerge el ishinde qajetti jaǵdaı jasaýǵa daıyn. Aýǵanstandaǵy ulttyq qaýipsizdik, protsesterdi jeńildetý, ákimshilik sybaılas jemqorlyqty joıý jáne memlekettik istegi ashyqtyq Aýǵanstandaǵy bıznestiń ósýine ákeldi. Ótken jyly Aýǵanstan eksportynyń kólemi alǵash ret 120 paıyzǵa ósti», - dedi Nýrıddın Azızı Astanada ótken bıznes forýmda.

Sonymen birge, saýda jáne tranzıt salasyndaǵy kópjaqty qatynastardy damytý úshin Aýǵanstannyń saýda seriktesterimen, onyń ishinde Ózbekstanmen, Iranmen, Reseımen, Qytaımen, Pákistanmen jáne basqa eldermen kelissózder júrgizilip, bazalyq ýaǵdalastyqtar jasalǵan.

«Sońǵy ýaqytta júzdegen sheteldik ınvestorlar Aýǵanstannyń túrli sektorlaryna ınvestıtsııa salýǵa qyzyǵýshylyq tanytty, jumys isteýge ruqsat aldy jáne óz qyzmetin bastaý úshin túrli Aýǵanstan vedomstvolarymen baılanysta boldy. Aýǵanstan ıslam ámirligi jeke sektorǵa múmkindik berý úshin kóptegen salyq jeńildikteri berýdi qarastyrdy, men shyn júrekten qurmetti ınvestorlardy Aýǵanstanǵa tolyq senimmen ınvestıtsııa salýdy suraımyn jáne shaqyramyn», - deıdi Nýrıddın Azızı.