Aýǵanstandyq dárigerler Astanada biliktilikterin arttyrýda
Shara Qazaqstan Respýblıkasy Syrtqy ister mınıstrliginiń uıymdastyrýymen Qazaqstandaǵy Birikken Ulttar Uıymynyń Damý baǵdarlamasynyń (BUUDB) jáne (JICA) Japon halyqaralyq yntymaqtastyq agenttiginiń járdem kórsetýimen ótýde.
Semınardyń ashylý saltanatyna elimizdiń syrtqy ister jáne densaýlyq saqtaý mınıstrlikteriniń basshylyqtary, Qazaqstandaǵy Japonııa men Aýǵanstan elshilikteriniń jáne BUUDB ókildiginiń laýazymdy tulǵalary qatysty.
Semınar Qazaqstannyń Aýǵanstanǵa kórsetip jatqan damýǵa resmı kómek aıasynda uıymdastyrylǵan jáne ana men bala densaýlyǵyn nyǵaıtýǵa baǵyttalady. Іs-shara qatysýshylarynyń 80%-dan astamy aýǵan áıelderi boldy.
Eki aptalyq semınarǵa Aýǵanstannyń densaýlyq saqtaý salasynda qyzmet atqaratyn 30 ókili qatysady. Qatysýshalardyń ana men bala densaýlyǵyna baǵyttalǵan Qazaqstannyń densaýlyq saqtaý júıesimen, perınataldyq ortalyqtar jumysy qaǵıdalary men olardyń qurylymymen tanysýy kútilýde. Semınar sheńberinde Ana men bala ulttyq ǵylymı ortalyǵynyń akýsherlik jáne jan saqtaý bólimshelerimen, jańa týylǵan balalar men somatıkalyq pedıatrııa bólimshelerimen tanysý uıymdastyrylatyn bolady.
Semınar qatysýshylary úshin sonymen qatar, aıaǵy aýyr jáne bala týý kezindegi asqynýlardy emdeýdegi jetekshi tehnologııalardy qoldaný máseleleri, aýyldyq jerlerde jańa týylǵan balalarǵa medıtsınalyq qyzmet kórsetý jáne basqa da máseleler boıynsha dárister oqylatyn bolady. Dáris berýshiler retinde Densaýlyq saqtaý mınıstri Eljan Birtanov, sondaı-aq jobany iske asyrýda negizgi áriptesterdiń biri bolyp tabylatyn Nazarbaev Ýnıversıtetiniń professorlary jumyldyrylady.
Atalǵan semınar densaýlyq saqtaý salasynda qyzmet etetin aýǵan áıelderiniń áleýetin arttyrý arqyly qazaqstandyq tájirıbemen bólisý jolymen Aýǵanstandy odan ári damytý boıynsha halyqaralyq qaýymdastyqtyń kúsh-jigerine Qazaqstannyń kezekti úlesin qosady.
Aıta keteıik, osy jobany iske asyrý týraly ýaǵdalastyq Qazaqstan Respýblıkasynyń Prezıdenti Nursultan Nazarbaev pen Japonııa Premer-Mınıstri Sındzo Abe 2015 jylǵy qazanda japon kóshbasshysynyń Astanaǵa jasaǵan resmı sapary barysynda qabyldanǵan Qazaqstan Respýblıkasy men Japonııa arasyndaǵy strategııalyq áriptestikti tereńdetý men keńeıtý týraly birlesken málimdemede kórinis tapqan.