Aýǵanstandaǵy jaǵdaı EQYU Parlamenttik Assambleıasynyń otyrysynda talqylandy
Onlaın rejımde uıymdastyrylǵan is-sharaǵa Tájikstan, Túrikmenstan jáne Ózbekstan parlamentteri delegatsııalarynyń jetekshileri, EQYU-nyń osy elderdegi keńseleriniń, sondaı-aq, EQYU qaqtyǵystardyń aldyn alý jónindegi ortalyǵynyń ókilderi qatysty.
Kezdesýge qatysýshylar Aýǵanstandaǵy qazirgi jaǵdaıǵa nazar aýdaryp, soǵan baılanysty Ortalyq Azııa elderi úshin óńir qaýipsizdigine tónýi múmkin qaterdi talqylady.
Pikir almasý barysynda EQYU PA tóraǵasynyń orynbasary, QR Parlamenti Senatynyń vıtse-spıkeri Asqar Shákirov Assambleıanyń qoldanystaǵy mandaty aıasynda aýǵan halqynyń senimin qalpyna keltirý sharalaryn ázirleý máselesine toqtaldy. Qazirgi tańda halyqaralyq koalıtsııa kúshteriniń osy elden shyǵarylýyna baılanysty Aýǵanstan azamattarynda erteńgi kúnge degen senimsizdik basym ekeni belgili.
Ortalyq Azııa elderi Aýǵanstannan bosqyndardyń jappaı kóshýi kezinde aımaqtaǵy jaǵdaıdyń turaqsyzdanýyna jáne radıkaldy aǵymdar ókilderiniń óńirge shoǵyrlaný múmkindigine alańdaýshylyq bildirdi.
Vıtse-spıker Aýǵan jerindegi jaǵdaıdy turaqtandyrý jumystaryna Qazaqstannyń qatysyp jatqanyn atap ótti. Ol Qazaqstan Prezıdenti Qasym-Jomart Toqaevtyń sheshimine sáıkes Almatyǵa BUU-nyń Aýǵanstanǵa kómek kórsetý jónindegi mıssııasynyń ýaqytsha keńsesi kóshirilgenin tilge tıek etti. Qazirgi tańda Mıssııa qyzmetkerlerine jumys isteýge jáne turýǵa qajetti jaǵdaı jasalǵan.
Otyrys sońynda Parlamentter ókilderi Aýǵanstandaǵy ahýalǵa onyń EQYU aımaǵyndaǵy qaýipsizdikke yqpaly turǵysynan turaqty monıtorıng júrgizý kerektigi týraly usynystar aıtty. Sondaı-aq, bul máseleni Parlamenttik Assambleıanyń aldaǵy is-sharalarynyń kún tártibine engizý qajettigi de sóz boldy.