Aýǵanstandaǵy «Talıban» júıesi: Áıelder er adamdarmen birge oqymaıdy

KABÝL. QazAqparat – «Talıban» qozǵalysy Aýǵanstannyń bilim berý júıesine jańa erejeler engizdi, olarǵa jynys belgisi boıynsha bólip ajyratý jáne dress-kod kiredi, dep habarlaıdy QazAqparat VVS aqparat agenttigine silteme jasap.

Jeksenbi, 12 qyrkúıek kúni «Talıban» qozǵalysynyń basshylyǵy Aýǵanstannyń bilim berý júıesindegi jańa erejeler týraly málimdedi. Jańadan qurylǵan úkimettiń Joǵary bilim mınıstri Abdýl Bakı Hakkanı endi áıelder er adamdarmen birge oqymaıtynyn málim etti.

Hakkanı málimdemesi jasalǵan kúni Kabýl qalasynda úsh júzden astam aýǵandyq áıel Kabýl ýnıversıtetiniń amfıteatrynda jınalyp, «Talıbannyń» genderlik saıasatyna qoldaýyn bildirý úshin sherýge shyqqan. Olardyńi kóbi qara nıkab kıip, qoldaryna tálibterdiń aq týlaryn ustaǵan.
Aktsııaǵa qatysýshy áıelder qoldaryna «Aýǵanstannan ketken áıelder bizdiń atymyzdan sóıleı almaıdy» jáne «Biz modjahedterdiń «Talıbannyń») qatynasy men tártibine qanaǵattanyp otyrmyz» dep jazylǵan plakattardy ustap, qala kóshelerimen júrip ótti.

Búginde engizilgen jańa erejeler endi Aýǵanstan áıelderine joǵary bilim alýǵa ruqsat bermeıdi degen pikirler aıtylýda, sebebi eldiń joǵary oqý oryndarynda áıelder men er adamdardyń bólek synyptaryn uıymdastyrý úshin resýrstar joq.
Buǵan Hakkanı áıel muǵalimderdiń jetkilikti ekenin, al resýrstar bolmaǵan jerde balamasy tabylatynyn aıtyp jaýap berdi.
«Barlyǵy ýnıversıtet múmkindikterine baılanysty», - dedi ol. «Biz sondaı-aq shymyldyq artynda oqytatyn er adam muǵalimderdi tartamyz, nemese tehnologııalardy qoldanamyz», - dep qosty.
Búgin Aýǵanstan mektepteriniń bastaýysh jáne orta synyptarynda er balalar men qyzdar bólek oqytylady.