Aýǵanstandaǵy atystan 6 adam qaza tapty

<p>ASTANA. KAZINFORM &ndash; Aýǵanstannyń ortalyǵyndaǵy Bamıan qalasynda atys bolyp, úsh aýǵanstandyq jáne úsh ıspanııalyq azamat oqqa ushty. Bul týraly <a href="https://belta.by/world/view/pri-strelbe-v-afganskom-bamiane-pogibli-shest-chelovek-vkljuchaja-inostrannyh-turistov-635261-2024/" target="_blank" rel="noopener">BELTA</a> aqparat agenttigi jazdy.&nbsp;&nbsp;</p>

Al Jazeera agenttiginiń habarlaýynsha, bazarda júrgen adamdarǵa oq atylǵan. 

Aýǵanstan Іshki ister mınıstrliginiń baspasóz hatshysy Abdýl Matın Kanı atystan zardap shekkender men qaza tapqandardyń deneleri Kabýlǵa jetkizilgenin aıtty. Sondaı-aq ol jaralanǵan 8 adamnyń 4-eýi – shetel azamaty ekenin jetkizdi. 

Jergilikti telearna aqparat kózderiniń habarlaýynsha, jaraqat alǵandar Norvegııa, Aýstralııa, Lıtva jáne Ispanııadan kelgen. 

Vedomstvo ókili oqıǵaǵa qatysty tergeýdiń jalǵasyp jatqanyn jáne 7 kúdiktiniń qamaýǵa alynǵanyn tilge tıek etti. Ázirge eshbir qylmystyq top shabýyl jasaǵanyn moıyndamaǵan. 

«Aýǵanstanda ıspanııalyq týrısterdiń qaza tapqany týraly jaısyz habar el turǵyndarynyń eńsesin túsirdi», - dep jazdy Ispanııa premer-mınıstri Pedro Sanches X áleýmettik jelisindegi paraqshasynda.

Ispanııa syrtqy ister mınıstri Hose Manýel Albares qurbandardyń deneleri jeksenbi kúni Ispanııaǵa jetkizilýi múmkin ekenin atap ótti.

Aıta keteıik, Bamıan – Aýǵanstandaǵy tanymal týrıstik qala. Kóptegen týrıst bul jerge Býdda músinderin kórý úshin keledi.