Aýǵanstanda jarylystan 8 adam qaza tapty
10:27, 06 Tamyz 2022
NUR-SULTAN. QazAqparat – Kabýl qalasyndaǵy jarylys saldarynan segiz adam qaza taýyp, taǵy 18 adam jaraqat aldy. Bul týraly qalalyq polıtsııanyń baspasóz hatshysy Halıd Zadran áleýmettik jelide habarlady, dep jazady QazAqparat Sınhýa agenttigine silteme jasap.
Halıd Zadrannyń aıtýynsha, jarylys Kabýldyń altynshy polıtsııa aýdanynda oryn alǵan. Jarylǵysh qurylǵy qol arbasyna ornatylǵan. Shabýyldyń nysanasy — ótip bara jatqan beıbit adamdar. Segiz adam qaza taýyp, taǵy 18 adam jaraqat aldy.
Ázirge bolǵan oqıǵa úshin jaýapkershilikti eshkim óz moınyna alǵan joq. Sońǵy ýaqytta Aýǵanstanda mektepter, meshitter jáne avtobýstarda birneshe jarylys bolyp, qaza tapqandar men jaralanǵandar sany kóbeıgen. Bul qylmys úshin jaýapkershilikti «Islam memleketi» ekstremıstik toby óz moınyna aldy.
Foto: aa.com.tr