Aýǵanstanda ustalǵan lańkes Atyraý oblysynyń týmasy bolyp shyqty

ASTANA. QazAqparat - Aýǵanstanda ustalǵan sodyrdyń aty-jóni anyqtaldy. Ol Atyraý oblysynyń týmasy Damır Znalıev bolyp shyqty, dep habarlaıdy «QazAqparat» HAA tilshisi.

Tergeý barysynda er kisi óziniń Qazaqstannan ekendigin aıtqan. «2017 jyldyń 19 qańtar kúni Aýǵanstannyń Sarı-Pýl provıntsııasynda jergilikti quqyq qorǵaý organdary lańkestik áreket jasady degen kúdikpen 1989 jyly Atyraý oblysynda dúnıege kelgen Qazaqstan Respýblıkasynyń azamaty Damır Amangeldiuly Znalıevti ustady. Oǵan Qazaqstannyń suratýymen Interpol jelisi boıynsha halyqaralyq izdeý jarııalanǵan», - dedi QR SІM baspasóz qyzmetiniń jetekshisi Ánýar Jaınaqov.

Qazirgi tańda quziretti organdarmen birlesip Qazaqstanǵa ekstradıtsııalaý jumystary júrgizilýde, dep habarlady SІM. 
Eske sala ketsek, Aýǵanstannyń soltústigindegi Sarı-Pýl provıntsııasynda túngi operatsııa barysynda eki er adam ustaldy .
Ózderin Qazaqstan men Túrkmenstannan kelgendigin málimdegen sodyrlardyń aty-jónderi Demır Zenlıev ( Demir Zenliyov) pen Abdýl Matın (Abdul Mateen) dep jarııa etildi.
Qazaqstan strategııalyq zertteýler ınstıtýtynyń dırektory Erlan Qarın Demır Zenlıevtiń aty-shýly bolǵan "Djýnd al-Halıfat" (Halıfat sarbazdary - red.) tobynyń úsh kóshbasshysynyń biri Damır Znalıev ekenin málimdedi . «Ol Rınat Qabıdolla, Orynbasar Munatovpen birge 2011 jyldyń tamyz-qyrkúıeginde Belgııa azamaty Mýaz Garsallaýmen birlesip aýǵan-pákistan aýmaǵynda atalmysh topty quryp, keıin osy jyldyń qazan aıynda Atyraýda terakti jasady. Top kóbine aqparattyq arańdatýshylyqpen aınalysqanymen, birqatar ózge de aktilerdi jasady dep aıyptalýda», dedi saıasattanýshy.