Aýǵanstanda sońǵy 72 saǵatta ondaǵan bala qaza tapty

KABÝL. QazAqparat – Aýǵanstanda balalardyń, áıelder men er adamdardyń ómirine mınýt saıyn qaýip tónip otyr. Sońǵy aıda eldiń Gılmend, Kandagar jáne Gerat provıntsııalaryna jasalyp jatqan shabýyldar kem degende myń adamnyń ólimine sebep boldy. Bul týraly QazAqparat BUU Jańalyqtary saıtyna silteme jasap habarlaıdy.

BUU Gýmanıtarlyq kómek úılestirýshisi Martın Grıffıts oryn alǵan jaǵdaıǵa qatysty alańdaýshylyǵyn bildirip, óz málimdemesinde: «Búgin men BUU Bas hatshysynyń jáne Qaýipsizdik keńesi músheleriniń qarapaıym halyqqa shabýyl jasaýdy, oq jaýdyrýdy toqtatý úndeýine qosylamyn», - dedi.

ıÝNISEF-te de Aýǵanstandaǵy jaǵdaıdyń kúrt nasharlaýyna qatysty alańdaýshylyǵy men narazylyǵyn bildirdi: sońǵy 72 saǵatta Kandagarda kem degende 20 bala qaza boldy, taǵy 130-y jaraqat aldy, al Paktııa provıntsııasynda kámelet jasqa tolmaǵan bes bala óltirilip, úsh bala zardap shekti.

«Bul jaı ǵana san emes. Árbir ólim men tán beıneti – qaıǵyly jaǵdaı. Olar – bireýdiń súıikti ul-qyzdary, aǵa-ápkeleri, týysy, dosy edi. Jaýlasqan taraptar bul balalardyń qorǵalý quqyǵyn buzyp, halyqaralyq quqyǵyn elemedi», - delingen BUU Balalar qorynyń málimdemesinde.

Foto MOM/M.Mohammed