Aýǵanstanda ózderin qazaqpyz deıtinder kóbeıip ketti – SІM

NUR-SULTAN. QazAqparat – Aýǵanstan aýmaǵynda basqa ult ókilderi ózderin qazaqpyz dep tanystyryp, kómek suraýdy jıiletken. Bul týraly QR Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Sońǵy kúnderi Qazaqstannyń Aýǵanstandaǵy elshiligine ózderin qazaqpyz dep tanystyratyn azamattardyń júginýi jıilep ketti. Biraqta is júzinde olardyń eshqandaı dálelderi joq. Olardyń keıbireýleri qazaq tilinde sóıleı almaıdy. Sondaı-aq ata-babalarynyń Aýǵanstan aýmaǵyna qonys aýdarý tarıhymen, rý-taıpalyq baılanystary týraly da aıta almaıdy. Biz etnıkalyq qazaqtardyń tarıhı otanyna oralýyna kómek kórsetý týraly barlyq ótinishterge muqııat tekserý jumystaryn júrgizemiz. Ol bir kúndik jumys emes sondyqtan ýaqyt talap etedi», - dedi Aıbek Smadırov tilshilerge bergen suhbatynda.

Buǵan deıin ol Aýǵanstan aýmaǵynda qansha qazaqtyń turyp jatqanyn aıtyp bergen edi.

Eske sala ketsek, Qazaqstan Aýǵanstannan 42 adamdy evakýatsııalady. Qazaqstanǵa 25 Qazaqstan azamaty, onyń ishinde 15 eresek adam jáne 10 bala, sondaı-aq QR Elshiliginiń qyzmetkerleri keldi.