Aýǵanstanda meshitte jarylys bolyp, 100 adam qaza tapty

NUR-SULTAN. TASS – QazAqparat – Juma kúni Aýǵanstannyń soltústiginde Qundyz provıntsııasyndaǵy Seıd-Abad sheıitter meshitinde qýatty jarylys bolyp, saldarynan 100 adam qaza tapty jáne ondaǵany jaraqat aldy. Bul týraly QazAqparat TASS-qa silteme jasap habarlaıdy.

Aamaj News aqparat agenttiginiń málimetinshe, shabýyl jergilikti ýaqytpen saǵat 13:30-da juma namazǵa adamdar jınalǵanda jasalǵan. Aldyn ala málimetke sáıkes, jankeshti lańkes meshittiń ishinde jarylǵysh zatty iske qosqan. Ariana News telearnasynyń aqparatyna sáıkes, jergilikti máıithanaǵa kem degende 50 adamnyń denesi jetkizilgen.
Jarylys týraly habarlamany eldegi bılikti jaýlap alǵan «Talıban» radıkaldy qozǵalysynyń ókili jáne ýaqytsha Aýǵan úkimetindegi aqparat jáne mádenıet mınıstriniń orynbasary Zabıhýlla Mýdjahıd rastady.
«Búgin kúndiz Qundyz provıntsııasynda bizdiń otandastarymyz-sheıitterdiń meshitinde jarylys bolyp, saldarynan adamdar qaza taýyp, jaraqat aldy. Arnaıy jasaq oqıǵa ornyna baryp, tergep jatyr», - dedi ol Twitter-degi paraqshasynda.
Óz kezeginde, mádenıet jónindegi «Talıban» komıssııasynyń múshesi Mohammad Djalal osy áleýmettik jelide terakti «Islam memleketi» ekstremıstik uıymynyń tarmaǵy «Horasandaǵy Islam memleketi» tobynyń sodyrlary jasaǵanyn habarlady.