Aýǵanstanda qansha qazaqstandyq dıplomat jumys istep jatyr

NUR-SULTAN. QazAqparat - Aýǵanstan aýmaǵyndaǵy qazaqstandyq dıplomattar týraly QR Syrtqy ister mınıstrliginiń resmı ókili Aıbek Smadııarov aıtyp berdi, dep habarlaıdy QazAqparat tilshisi.

«Osydan birneshe kún buryn biz Aýǵanstan aýmaǵynda «Qazaqstan azamaty joq» degen bolatynbyz. Sebebi bizge belgili otandastarymyz ol jaqtan shyqty. Degenmen sońǵy 2-3 kúnniń ishinde Aýǵanstandaǵy elshilikke Qazaqstan azamatymyz dep bir top adam júgindi. Olardyń tıisti qujattary bar. Osyǵan deıin habarlaǵanymyzdaı 25 adam Almatyǵa jetkizildi. Onyń qatarynda 15 eresek jáne 10 bala bar. Qazirgi tańda Aýǵanstanda 10 qazaqstandyq dıplomat qyzmetin jalǵastyryp jatyr. Olar shtattyq rejimde jumys istep jatyr, qaýipsizdikteri qorǵalǵan», - dedi Aıbek Smadııarov tilshilerge bergen suhbatynda.

Buǵan deıin habarlaǵanymyzdaı, Qazaqstan Aýǵanstannan 42 adamdy evakýatsııalady. Bul týraly QR Qorǵanys mınıstrliginiń baspasóz qyzmetinen málim boldy.

Sondaı-aq, QR Syrtqy ister mınıstrligi Prezıdent Aýǵanstandaǵy qazaqtardy tarıhı otanyna qaıtarýǵa kómek kórsetýdi tapsyrǵanyn málimdedi.

Odan bólek, A. Smadııarov Aýǵanstanda ózderin qazaqpyz dep tanystyrýshylardyń kóbeıgenin aıtty.