Aýǵanstanda AQSh-tyń arnaıy operatsııasy barysynda «Ál-Kaıda» kóshbasshysy óltirildi

NUR-SULTAN. QazAqparat – AQSh prezıdenti Djo Baıden Aýǵanstanda «Ál-Kaıda» kóshbasshysy Aıman Zavahırıdiń óltirilgenin málimdedi, dep habarlaıdy QazAqparat VVS agenttigine silteme jasap.

«Ádildik ornady. Terrorısterdiń kóshbasshysy endi joq. Biz eshqashan artqa sheginbeımiz», - dedi Baıden.

Onyń aıtýynsha, Zavahırıdiń mekenjaıy bıyl Amerıkanyń arnaıy qyzmetine belgili bolǵan.

«Ol Amerıka azamattaryna, Amerıka áskerı qyzmetshilerine, dıplomattary men Amerıka múddesine zorlyq kórsetip, adamdardy óltirdi», - dedi Baıden.

Onyń aıtýynsha, Hellfire eki zymyrany ushqyshsyz basqarylatyn qurylǵydan ushyrylǵan. Soqqy saldarynan Zavahırı turatyn úıde onyń týystary da, beıbit turǵyndar da zardap shekken joq.

Zavahırı 2001 jyldyń 11 qyrkúıeginde AQSh-taǵy shabýyldyń uıymdastyrýshysy boldy. Ol sodan beri qashyp júrdi.

Ol 2011 jyly Pákistanda Ýsama bın Laden óltirilgennen keıin «Ál-Kaıdany» basqardy.

Foto:REUTERS