Aýǵanstan úkimeti Qazaqstannan bıdaı men un baǵasyna jeńildik berýdi surady

ASTANA. QazAqparat – Aýǵanstannyń ónerkásip jáne saýda mınıstri Nýrıddın Azızı Qazaqstanǵa eksporttalatyn taýarlarǵa jeńildigi bar tarıf qoldanýdy surady, dep habarlaıdy QazAqparat tilshisi.

«Aýǵanstan qysqa merzimde ondaǵan otandyq taýar óndirisiniń arqasynda ózin-ózi qamtamasyz etýge kóshkenin qýanyshpen habarlaımyn. Budan basqa, bizdiń ónerkásiptik ónimderimizdiń júzdegen ataýlary qurylyp, saýda artyp keledi. Biz baýyrlas Qazaqstannan Aýǵanstannyń otandyq ónerkásibin qoldaý úshin sizderge eksporttalatyn Aýǵanstan taýarlaryna jeńildigi bar tarıf qoldanýdy suraımyz», - dedi Nýrıddın Azızı Astanada ótken bıznes forýmda.

Sondaı-aq, N. Azızı Aýǵanstannyń halqy men jeke sektoryn qoldaý maqsatynda Qazaqstannan Aýǵanstanǵa ımporttalatyn bıdaı men un baǵasyna arnaıy jeńildikter berýdi surady.

«Men atap ótken keıbir ekonomıkalyq jáne saıası máselelerge qaramastan, Aýǵanstanda paıdaly qazbalardy óndirý, ónerkásip, aýyl sharýashylyǵy, saýda jáne qyzmet kórsetý salasynda naqty jáne praktıkalyq ınvestıtsııalyq múmkindikter bar jáne Qazaqstan Respýblıkasynyń ınvestorlaryna Aýǵanstandaǵy ózderin qyzyqtyratyn salalarǵa ınvestıtsııa salý usynylady», - dedi spıker.

Buǵan deıin Nýrıddın Azızı Aýǵanstannyń syrtqy saıasaty ashyqtyqqa, ekonomıkalyq jáne saýda yntymaqtastyǵyna negizdelgenin aıtqan edi.

Sondaı-aq, Aýǵanstanǵa júzdegen sheteldik ınvestor qyzyǵýshylyq tanytyp, el eksporty alǵash ret 120 paıyzǵa ósken.