Aýǵanstan úkimeti gýmanıtarlyq kómek úshin Qazaqstanǵa alǵys aıtty

KABÝL. QazAqparat – Búgin Qazaqstannyń Aýǵanstandaǵy Elshisi Álimhan Esengeldıev Aýǵanstannyń densaýlyq saqtaý mınıstri Ahmad Djavad Osmanımen kezdesti, dep habarlaıdy QazAqparat.

QR Syrtqy ister mınıstrliginen málim etkendeı, kezdesý barysynda taraptar eki elde koronavırýs ınfektsııasynyń taralýynyń qazirgi ahýalyn, densaýlyq saqtaý salasyndaǵy yntymaqtastyqtyń perspektıvalyq baǵyttaryn jáne ózara qyzyǵýshylyq týdyratyn basqa da máselelerdi talqylady.

«Densaýlyq saqtaý mınıstri koronavırýs pandemııasy kezinde Aýǵanstan halqyna kórsetken kómegi úshin Qazaqstanǵa izgi rızashylyǵyn bildirdi», - dedi vedomstvodan.

Málim etilgendeı, Qazaqstannan jóneltilgen gýmanıtarlyq kómekti Aýǵanstan Islam Respýblıkasynyń halqyna resmı tapsyrý rásimi bıylǵy 20 maýsymda Haıraton qalasynda ótti.

«Barlyq sanıtarlyq-epıdemıologııalyq normalardy saqtaı otyryp, ishinde 1900 tonna un, 500 tonna makaron ónimderi, 4 myń lıtr kúnbaǵys maıy jáne 200 myń qoıýlatylǵan sút bankalary kiretin 46 vagon gýmanıtarlyq júk jetkizildi.

Atalǵan azyq-túlik ónimderin AIR úkimeti eldiń muqtaj aımaqtaryna taratty», - dep naqtylady QR SІM-nen.