Aýǵanstan tóńireginde ne bolatynyn boljaý qıyn – Tımýr Dándibaev

NUR-SULTAN. QazAqparat – Qorǵanys mınıstriniń orynbasary Tımýr Dándibaev Aýǵanstandaǵy áskerı-saıası ahýal týraly pikir bildirdi, dep habarlaıdy QazAqparat.

Ortalyq kommýnıkatsııalar qyzmetinde vıtse-mınıstr Tımýr Dándibaevtan BAQ ókilderi Aýǵanstandaǵy jaǵdaıdyń qalaı órbýi múmkin ekenin surady.

«Aýǵanstandaǵy qazirgi áskerı-saıası ahýal aıtarlyqtaı kúrdeli. Dál qazir qandaı da bir boljam jasaý qıyn. QR Qorǵanys mınıstrligi Aýǵanstan tóńiregindegi ahýal týraly aqparattardy únemi ózektilendirip otyr. Onyń ishinde sheteldik áriptestermen, óńirlik uıymdarmen ózara áreketterdi jiti pysyqtap otyr. Sondyqtan, atalǵan baǵytta ázirge naqty málimet aıta almaımyz. Jaǵdaıdy qadaǵalap, tıisti sheshim qabyldap jatyrmyz jáne kútý rejıminde turmyz», - dedi Qorǵanys mınıstriniń orynbasary.

Buǵan deıin ol Qazaqstan áskerıleri Aýǵanstan shekarasyna qandaı jaǵdaıda jiberiletinin aıtqan bolatyn.

«Halyqaralyq qaýipsizdik sharalaryn qamtamasyz etip, qoldaý úshin qandaı da bir kontıngentti jiberý úshin bizge birneshe shart kerek. Ol sharttyń biri – eki taraptyń biri Ujymdyq qaýipsizdik kelisimsharty uıymyna kómek surap júginýi tıis. Ekinshiden, Ujymdyq qaýipsizdik keńesi deńgeıinde sheshim shyǵýy qajet. Árıne, ol sheshimdi bizdiń eldiń Parlamenti ratıfıkatsııalap, halyqaralyq mıssııa atqaratyn kontıngenttiń jiberilýine ruqsat berý kerek. Osy sharttardyń bári oryndalǵan jaǵdaıda biz sáıkesinshe ózimizdiń halyqaralyq mindetterimizdi oryndaýǵa daıynbyz», - dedi Tımýr Dándibaev.