Aýǵanstan bilim mınıstrligi JOO-larǵa qyzdardy qabyldaý emtıhandaryna jiberýge tyıym saldy

ASTANA. QazAqparat – Aýǵanstan joǵary bilim berý mınıstrliginiń resmı ókili Zıaýlla Hashmı elde bılik qurǵan «Talıban qozǵalysy» (Qazaqstanda tyıym salynǵan – red.) áıelderdiń bilim alýyna qatysty tyıymdy kúsheıtip jatqanyn málimdedi, dep habarlaıdy QazAqparat agenttigi Associated Press basylymyna silteme jasap.

Eldiń joǵary bilim berý mınıstrligi barlyq memlekettik jáne jeke ýnıversıtetterge 2023 jylǵy qabyldaý emtıhandaryna qyzdardy tirkemeýdi buıyrdy.

«Joǵary bilim berý mınıstrligi barlyq jeke ýnıversıtetter men oqý oryndaryna qabyldaý emtıhandaryna qyzdardy qatystyrýǵa tyıym saldy», - delingen mınıstrliktiń habarlamasynda.

Buǵan deıin «Talıban qozǵalysy» (Qazaqstanda tyıym salynǵan – red.) aýǵan áıelderine endi ýnıversıtette oqýǵa tyıym salynatynyn málimdegen bolatyn. Aýǵanstandaǵy áıelderdi kezeń-kezeńimen bilim alý múmkindiginen aıyryp jatyr. 2021 jyly tálipter qyzdardyń orta mektepke barýyna tyıym saldy. 2022 jyldyń naýryzynda shetelder úkimetteri tálipterdiń bul sheshimin synǵa alǵan soń, olar qyzdarǵa arnalǵan mektepter jaqynda ashylatynyn málimdedi, biraq ashylmaǵan kúıi qaldy.

Aýǵanstannyń 24 provıntsııasynda 140 jeke ýnıversıtet bar, onda 200 000-ǵa jýyq stýdent oqıdy. Olardyń shamamen 60-70 myńy – áıelder. Jalpy, ýnıversıtetterde 25 000-ǵa jýyq adam jumys isteıdi.

Foto: apnews.com