Aýǵan soǵysynyń ardagerleri qazaqstandyq qoǵamdy «Ardagerler týraly» zańyn talqylaýǵa shaqyrdy

ASTANA. 12 mamyr. QazAqparat /Aıdar Ospanalıev/ - «Ardagerler týraly» zań óskeleń urpaq úshin, bolashaq qazaqstandyq patrıottar úshin kerek. Búgin atalmysh zańǵa baılanysty jýrnalıstermen kezdesken Aýǵan soǵysy ardagerleri qaýymdastyǵynyń ókilderi osylaı dep málimdedi.

Olardyń sózderinshe, Qazaqstannyń bolashaǵy jolyndaǵy ıgilikterge qazaqstandyq ardagerlerdiń, sonyń ishinde aýǵan soǵysy ardagerleriniń de qosyp otyrǵan úlesteri az emes. Sondyqtan da

bolar, ardagerlerdi búginde Memleket basshysy Nursultan Nazarbaev ta qasterlep, olarǵa zor kóńil bólip otyr. «Sońǵy birneshe jyldan beri «Ardagerler týraly» zań qabyldaý máselesi kóterilip keledi. Alaıda mundaı bastamalar ádette qandaı da bir merekeler qarsańynda kóteriledi de, mereke ótken soń umytylyp, merzimdik máselege aınalady, nemese ony qandaı da bir saıası kúshter tek jeke múddeleri úshin saılaý naýqany barysynda ǵana kóterýde. «Osymen baılanysty «Qazaqstan ardagerleri» uıymdarynyń qaýymdastyǵy osy máselege baılanysty qoǵam arasynda durys kózqaras qalyptasýy kerek degen oımen barlyq qoǵamdyq jáne saıası kúshterdi «Ardagerler týraly» zańyn talqylaýǵa shaqyrady», -dedi atalmysh qaýymdastyq tóraǵasynyń orynbasary Talǵat Ábdijaparov.

Sondaı-aq onyń sózinshe, búginde kóptegen azamattar zań jobasynyń aınalasyndaǵy áńgimelerdi durys túsinbeı júr. Óıtkeni olar máseleniń tek materıaldyq jaǵyna ǵana nazar aýdaryp otyr. «Bizdiń maqsatymyz elimizdiń azamattaryn osyndaı teris pikirden aryltyp, zań jobasynyń tarıhı máni qanshalyqty zor ekenin túsindirý. Biz birlese otyryp, osy másele boıynsha ortaq baılamǵa kelemiz degen oıdamyz. «Ardagerler týraly» zań birinshi kezekte óskeleń urpaq úshin, Qazaqstannyń bolashaq patrıottary úshin qajet»,-dedi T.Ábdijaparov