Aýǵan soǵysynyń ardageri Qonaev qalasynyń «Qurmetti azamaty» atandy

<p>QONAEV. KAZINFORM &ndash; Qonaevta Keńes áskeriniń Aýǵan jerinen shyǵarylǵanyna 35 jyl tolýyna oraı saltanatty is-sharalar ótti.&nbsp;</p>

Qonaev ákimdiginiń málimetinshe, ardagerler Jeńis parkindegi eskertkishke gúl shoqtaryn qoıdy. Qan maıdanda soǵysyp, qaza tapqan ınternatsıonalıst jaýyngerler 1 mınýt únsizdikpen eske alyndy. Osydan soń Mádenıet úıinde sharaǵa Aýǵan soǵysynyń ardagerleri, áskerıler, aqsaqaldar men qala ákiminiń orynbasary Sáýle Nursoltanova qatysty.

«9 jyl 10 aıǵa sozylǵan Aýǵan soǵysy týraly derekterge sáıkes, Keńes odaǵynan soǵysqa 600 myńnan astam adam qatysqan. Osydan 35 jyl buryn Aýǵan soǵysynan 21371 qazaqstandyq ardager aman esen óz otanyna oralǵan, olardyń qatarynda Qonaevtyń búginde kózi tiri 91 ardageri bar. Búgingi uıymdastyrylǵan shara bolashaq urpaq úshin tálim-tárbıe, jaýyngerlik boryshtyń mánin qadirleýge baǵyttalǵan. Sizderdiń kórsetken erlikterińiz - jastarǵa úlgi. Sizder beıbit ómirge aralasyp, otbasyn quryp, sanaly urpaq ósirip, halyq kóshin alǵa jyljytýǵa, elimizdiń damýyna úles qostyńyzdar», - dedi óz sózinde qala ákiminiń orynbasary.

Foto: Qonaev qalasynyń ákimdigi

Saltanatty keshtiń barysynda Aýǵan soǵysynyń ardageri Marat Kalgýlovqa Qonaev qalasynyń «Qurmetti azamaty» ataǵy berildi. Sondaı-aq ardagerlerge 35 jyldyq merekelik medal, Qonaev qalasy ákiminiń Alǵys haty, Qorǵanys isteri jónindegi departamenttiń marapattary tabys etildi.

Saltanatty shara kontserttik baǵdarlamaǵa ulasty. Onda túrli patrıottyq ánder shyrqalyp, ardagerlerge qurmet kórsetildi.