Áýekompanııalarǵa 40 mln teńge aıyppul salyndy - Azamattyq avıatsııa komıteti

ASTANA. QazAqparat – Qazaqstanda jolaýshylar tasymalymen aınalysatyn áýekompanııalarǵa 40 mln teńge aıyppul salyndy. Bul týraly Ortalyq kommýnıkatsııalar qyzmetinde ótken brıfıngide Azamattyq avıatsııa komıtetiniń tóraǵasy Tımýr Lastaev málimdedi, dep habarlaıdy QazAqparat tilshisi.

«Jalpy somasy 40 mln teńge bolatyn 14 ákimshilik aıyppul salyndy. Bul salystyrmaly túrde az sııaqty kórinýi múmkin, biraq tasymaldaýshylar úshin bedel óte mańyzdy. Olar qandaı da bir olqylyqtar úshin jaýapkershilikke tartylǵan kezde, bul kompanııalardyń bedeline nuqsan keltiredi. Dáleldengen jaǵdaıda biz árqashan jolaýshylardyń quqyǵyn qorǵaımyz», - dedi Talǵat Lastaev.

Sonymen qatar, ol áýe kemeleri parkiniń qalaı jańaryp jatqanyna da toqtaldy.

«Ótken jyly batys elderinde shyǵarylǵan 14 jańa áýe kemesi satyp alynyp, parktegi jalpy ushaq sany 87-ge jetti. Bıyl bizdiń avıakompanııalar taǵy 3 áýe kemesin aldy. Jyl sońyna deıin 10 ushaq ákelý josparlanyp otyr. Sonymen qatar 2025 jylǵa deıin 29 áýe kemesin satyp alý kózdelýde» - dep túıindedi Talǵat Lastaev.

Qosa ketsek, búgin Air Astana áýekompanııasynyń prezıdenti Pıter Foster Fly Arystan Air Astana-dan bólinse, onda tarıfter tómendemeıtinin málimdegen edi.

Al, Úkimet basshysy Álıhan Smaıylov áýekompanııanyń jolaýshymen dıalog ornatý mádenıetiniń tómendigin synǵa aldy.