Áýe reısteriniń keshigýi qalypty ádetke aınalyp barady – Úkimet basshysy

<p>Búgin Úkimet otyrysynda Premer-Mınıstr Álıhan Smaıylov avıatsııa salasyndaǵy shuǵyl sheshimdi qajet etetin máselelerdi atady, dep habarlaıdy Kazinform.&nbsp;</p>

«Búginde avıatsııa salasynyń damý kórsetkishteri jaman emes. Bir jyl ishinde reısterdiń sany 2 esege jýyq, ıaǵnı 410 myńǵa deıin ulǵaıdy. Jolaýshylar aǵyny 22%-ke ósip, shamamen 13 mln adamǵa jetedi dep kútilýde. El ishindegi áýe tasymaly da edáýir ósti. 51 marshrýt boıynsha aptasyna 644 reıs jasalady. Bıyl 16 halyqaralyq marshrýt ashyldy jáne qaıta jandandy. Kelesi jyly Kýala-Lýmpýr, Sıngapýr, Tokıo jáne basqa qalalarǵa jańa reıster ashý josparlanyp otyr. Áýejaılardyń ınfraqurylymy da damýda», - dedi Úkimet basshysy.

Onyń atap ótýinshe, osy salaǵa kelgen jeke ınvestorlar qazirdiń ózinde áýejaılardy damytýǵa 2,1 mlrd. dollarǵa jýyq qarajat saldy.

«Atap aıtqanda, Almatyda perrondy kúrdeli jóndeý jumystary júrgizilýde. Sondaı-aq, júkterdi óńdeý rásimderin jetildirý sharalary qolǵa alyndy. Shymkentte jańa jolaýshylar termınalynyń qurylysy aıaqtalýǵa jaqyn. Astanada Birikken Arab Ámirlikterinen kelgen kompanııa ushý-qoný jolaǵyn rekonstrýktsııalaýdy, kargo-termınalyn keńeıtýdi josparlap otyr», - dedi ol.

Degenmen, Premer-Mınıstr bul salada shuǵyl sheshimderdi qajet etetin ózekti máseleler bar ekendigine toqtaldy.

«Aıtalyq, negizgi máseleniń biri – avıaotyn tapshylyǵy. Ol jylyna shamamen 300 myń tonnany quraıdy. Bul tapshylyq ımport esebinen jabylyp keledi. Máseleni sheshý úshin otyn jetkizý kanaldaryn ártaraptandyryp, ony saqtaýǵa arnalǵan tıisti ınfraqurylymdy damytý qajet. Sondaı-aq, áýejaılardy damytý da qosymsha sharalardy talap etedi. Ol úshin áýejaı ınfraqurylymyn damytyp, júkter men jolaýshylardy rásimdeý protsessterin tolyq avtomattandyrý qajet. Bul 2030-shy jylǵa qaraı óńdeletin júk kólemin jylyna 130 myń tonnadan 1 mln tonnaǵa deıin, al jolaýshylar aǵynyn 25 mln adamǵa deıin ulǵaıtýǵa múmkindik beredi», - dedi Álıhan Smaıylov.

Úkimet basshysy salany kadrlarmen qamtamasyz etýde de problema bar ekendigin ashyq aıtty.
«Búginde ushqyshtar, ınjenerler men tehnıkalyq personaldar jetispeıdi. Reısterdiń keshigýi de qalypty ádetke aınalyp barady. Oǵan qolaısyz aýa-raıy ǵana sebepshi emes. Sondyqtan, avıakompanııalar jolaýshylar men ushaqtarǵa qyzmet kórsetý sapasyn jaqsartyp, áýe parkin keńeıtýi qajet», - dedi Úkimet basshysy.