Áýe reısteri úzdiksiz oryndalady – Indýstrııa mınıstrligi avıaotyn jetispeýshiligi týraly

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi elorda áýejaıy men «SKAT» áýe kompanııasynyń avıaotyn jetispeýshiligine qatysty málimdemelerine pikir bildirdi, dep habarlaıdy QazAqparat.

«Pavlodar munaı-hımııa zaýytyndaǵy jóndeý jumystaryna baılanysty avıaotynnyń ishki naryǵynda áýejaılar men áýe kompanııalary úshin avıakerosın óndirýde jáne qamtamasyz etýde belgili bir qıyndyqtar bar. Degenmen turaqty jolaýshylar jáne júk reısteri úzdiksiz qamtamasyz etildi. QR IIDM QR Energetıka mınıstrligimen birlesip, zaýyttardan, jeke kompanııalardan, «QazMunaıGaz-Aero» JShS-dan Pavlodar zaýyty jumysyn qaıta bastaǵansha áýe kompanııalary men áýejaılarǵa otyn jetkizý kestesin ázirledi», - delingen mınıstrlik habarlamasynda.

Qazirgi ýaqytta áýejaılarda 27,9 myń tonna otyn bar. Oǵan qosa, 9,2 myń tonna zaýyttardan jóneltildi jáne 15,6 myń tonnaǵa kelisimshart jasaldy. Jalpy kólemi – 53 myń tonna.

Qazan aıynyń sońyna deıin munaı óńdeý zaýyttary 2 myń tonna avıaotyn shyǵarady. Onyń ishinde Nur-Sultan áýejaıy úshin qosymsha otyn bólinedi. Sondaı-aq, SKAT áýe kompanııasyna Shymkent munaı óńdeý zaýytynan qosymsha avıakerosın jetkizý josparlanyp otyr.

«Elorda áýejaıynda 3,1 myń tonna avıakerosın bar. Jaqyn kúnderi 3,9 myń tonna jetkizý josparlanyp otyr. Almaty áýejaıyndaǵy otyn qaldyǵy – 5,4 myń tonna. 4 myń tonna jóneltilip, jolda bara jatyr. 5,8 myń tonnaǵa kelisimshart jasaldy. Eır Astana áýe kompanııasynda 7,4 myń tonna, SKAT áýe kompanııasynda 1,7 myń tonna otyn qalǵan. 1,5 myń tonnaǵa kelisimshart jasaldy. Turaqty áýe reısterdi úzdiksiz oryndala beredi», - dep habarlady ındýstrııa jáne ınfraqurylymdyq damý mınıstrligi.

Aıta keteıik, buǵan deıin Nursultan Nazarbaev halyqaralyq áýejaıy avıajanarmaı tapshylyǵynan áýejaıdyń úzdiksiz jumysy toqtaýy múmkin dep dabyl qaqqan bolatyn.