Áýe qorǵanysy kúshteriniń mamandary biliktiligin shyńdaýda
Ushýdy basqarý toby degenimiz – ekıpajdardyń ushý tapsyrmalaryn tolyq, ýaqytyly jáne qaýipsiz oryndaýyn qamtamasyz etý úshin jerden basqarýdy júrgizetin arnaıy daıarlanǵan ofıtserler sanaty.
Mamandar áýedegi jáne ushý kezindegi týyndaǵan keıbir kúrdeli jaǵdaılarda ekıpajdarǵa bilikti kómek kórsetýdegi bilimderin jetildiredi. Olar túrli ushý kezeńderinde ekıpajdar men avıatsııalyq bólimshelerdi tikeleı basqarý barysynda sheshimder qabyldaý algorıtmderin is júzinde pysyqtaıdy.
Praktıkalyq daǵdylardy bekitý úshin «Vırtýaldy áýeaılaq» jattyǵý kesheni jáne L-39 ushaǵynyń jáne Mı-8MT tikushaǵynyń údetkishteri paıdalanylady. Bul oqý qurylǵylary kýrstyń oqý baǵdarlamasyn meńgerýdiń tıimdiligin edáýir arttyrady.
«Ushýdy basqarý – kúrdeli jáne jaýapty úderis. Bul kóp jaǵdaıda jaýyngerlik ázirliktiń jaı-kúıine, jeke quramnyń áýedegi mashyqtaný deńgeıine, ushý daıarlyǵynyń qaýipsizdigi jáne avıatsııalyq tehnıkany apatsyz paıdalanýǵa baılanysty bolady. Jylda ótetin kýrstar alǵan bilimimizdi bekitýge jáne osy saladaǵy jańa ázirlemelermen tanysýǵa múmkindik beredi», – dep atap ótti Qyzylorda avıatsııalyq komendatýrasynyń bastyǵy podpolkovnık Ǵanı Nárikbaev.
Jyl saıynǵy oqytý avıatsııalyq tehnıkany paıdalaný qaýipsizdiginiń deńgeıin arttyrý, teorııalyq bilimdi tereńdetý jáne mamandardyń kásibı daǵdylaryn jetildirý maqsatynda júrgiziledi.
Bıylǵy jyly Áýe qorǵanysy kúshteriniń qurylymdyq bólimshelerinen 24 áskerı qyzmetshi oqıdy. Sabaqtyń jalpy kólemi 99 saǵatty quraıdy. Oqý sońynda tyńdaýshylar keshendi emtıhan tapsyryp, oqý baǵdarlamasyn meńgergeni týraly kýálik alady.