Áýe qorǵanysy kúshteriniń bólimderi men bólimsheleri keshendi tekserýden ótti - QR Qorǵanys mınıstrligi (FOTO)

ASTANA. QazAqparat - Áýe qorǵanysy kúshteri bas qolbasshysy basqarmasynyń ofıtserlerinen quralǵan keshendi komıssııa Aqtaý garnızony 51809 áskerı bóliminiń radıotehnıkalyq bólimshelerin tekserýge josparly jumys saparymen bardy, dep habarlady QR Qorǵanys mınıstrliginen.

Sondaı-aq, bir ýaqyttaǵy keshendi tekseris ÁQK-niń birneshe áskerı bólimderinde júrgizildi. 

"Áýe qorǵanysy kúshteriniń bas qolbasshysy avıatsııa general-leıtenanty Nurlan Ormanbetovtiń basshylyq etýimen jumys jasaǵan komıssııa brıgadanyń qolbasshylyǵy men laýazymdy adamdaryn jáne jekelegen radıolokatsııalyq rotalardyń komandırlerin tyńdady, ÁQK-niń bólimderin tynys-tirshilik úshin qajetti materıaldarmen qamtamasyz etilý problemalary boıynsha áńgime júrgizdi", delingen habarlamada. 

Jaýyngerlik ázirlikti, qarý-jaraq pen áskerı tehnıkanyń jaı-kúıin, oqý-materıaldyq bazany jáne jeke quramnyń jasaqtalýyn tekserdi. Bul rette erekshe nazar áskerler qyzmetine, brıgadanyń zenıttik-zymyran dıvızıondary men radıolokatsııalyq bólimshelerdiń jaýyngerlik kezekshiliginiń uıymdastyrylýy men atqarylýyna aýdaryldy.

Sonymen qatar, komıssııamen jeke quramnyń quqyqtyq tártibin, moraldyq-psıhologııalyq jaǵdaıy men áskerı tártiptiligin ustap turý jóninde komandırlerdiń tárbıe jumysy men qyzmetine baǵa berildi.

Sapar barysynda avıatsııa general-leıtenanty Nurlan Ormanbetov Aqtóbe qalasyndaǵy Áýe qorǵanysy kúshteriniń Áskerı ınstıtýtyna baryp, kýrsanttarmen áńgime ótkizdi.

Tekserý aıaqtalǵannan keıin usynymdar men nusqaýlar berildi. Áskerı bólimder men bólimshelerdiń komandırlerine qajetti kómek kórsetildi.