Áýe qorǵanysy kúshteriniń áskerı qyzmetshileri óz erikterimen qan tapsyrdy

ASTANA. QazAqparat  - Taldyqorǵan garnızonynda 100-ge jýyq áskerı qyzmetshi «Men - donormyn!» aktsııasy sheńberinde Almaty oblysynyń qan quıý ortalyǵynyń turaqty donorlary atandy, dep habarlaıdy QR Qorǵanys mınıstrliginiń baspasóz qyzmeti.

Em-shara aldynda árbir donor qan tobyn anyqtaý boıynsha aldyn ala zerthanalyq tekserýden, sondaı-aq yqtımal qarsy kórsetilimderdi túsindirý úshin dárigerlermen áńgimelesýden ótti.

«Adamdar kómekke muqtaj barsha jandarǵa qolushyn sozýy tıis. Statıstıka boıynsha árbir úshinshi adam ómirinde qan aýystyrýǵa zárý bolady. Biz búgin 450 mıllılıtr qanymyzdy berdik jáne qanymyz kóptegen adamdardyń ómirin qutqaryp qalady degen úmittemiz», - deıdi áskerı bólim komandıriniń orynbasary podpolkovnık Serik Sarabozov.

Qazirgi ýaqytta QR Qarýly Kúshteriniń áskerı qyzmetshileri osyndaı is-sharalarǵa belsene atsalysady jáne Qazaqstandaǵy donorlyqty damytý isine óz úlesterin qosyp keledi. Jyl saıyn QR QK-niń 7000-ǵa jýyq áskerı qyzmetshisi erkin túrde aqysyz negizde qan tapsyrady.