Áýe qorǵanys kúshteri ınstıtýtynyń túlekteri sáttilikke tıyn laqtyrdy
Eki márte Keńes Odaǵynyń Batyry Talǵat Bıgeldınov atyndaǵy áýe qorǵanysy kúshteriniń áskerı ınstıtýty búgin 93 túlekke dıplom berdi. Olardyń arasynda Qyrǵyzstan men Tájikstan respýblıkalarynyń 11 áskerı qyzmetshisi bar.
«Árbir memlekettiń bolashaǵy, damýy onyń qaýipsizdigine baılanysty. Sol qaýipsizdikti qamtamasyz etetin azamattardyń ómirinde búgin tarıhı kún týdy. Joǵary oqý ornyn bitirip, elimizdiń, Otanymyzdyń, halqymyzdyń aldyndaǵy azamattyq boryshty óteýge kirisesizder. Ofıtser - áskerdiń abyroıy. Ofıtser tek memlekettik qyzmetker emes, ol jeńisti uıymdastyrýshy, basqarýshy, áskerge rýhanı tárbıe berýshi. Elbasy Nursultan Nazarbaev «Bolashaqqa baǵdar: rahanı jańǵyrý» maqalasyn jarııalady. Biz óz urpaǵymyzdy Otandy, ultty súıýge tárbıeleýimiz kerek»,- dedi oblys ákimi Berdibek Saparbaev.
Kýrsanttar 4 jyl 2 aı boıy áskerı mashyqtardy meńgerip, avıatsııa mamandyqtaryn ıgerdi. Shydamdy, tabandy bolýǵa úırendi. Olar joǵary oqý ornynda áýe kemelerin paıdalaný, ıaǵnı, ushaqtar men tikushaqtardy basqarýdy úırenedi. Sonymen qatar, áýe kemelerine tehnıkalyq qyzmet kórsetýshiler men jer men kókti baılanystyryp otyratyn radıoelektrondy jabdyqtarmen jumys isteıtin áskerı qyzmetshiler oqytylady. Dıplom tabystaý saltanatyna QR Qorǵanys mınıstriniń orynbasary Talǵat Muhtarov qatysty. Ol QR Qorǵanys mınıstriniń quttyqtaý hatyn oqyp berdi. Ata-analar da jyly lebizderin bildirdi.
«Bilim bergen azamattardyń, elimizdiń, Otanymyzdyń aq úmitin aqtaıdy dep senemiz. Ómirde qasıetti zattar bar. Ol kók týymyz, qoınaýy baılyqqa toly jerimiz, elimiz. Osy qasıetke qaýip tóngen jaǵdaıda elin qorǵaý ár azamattyń boryshy. Birneshe kúnnen soń elimizdiń ár túkpirindegi áskerı qyzmette eńbek etemizder»,- dedi túlekterdiń ata-analarynyń biri Kenjebek Seısenbaı.
Dıplom tabystaý rásiminen soń sapta júrip ótken leıtenanttar sáttilikke tıyn laqtyryp, vals bıledi.