Áýe kompanııasy «qara tizimdegilerdi» tasymaldamaýǵa quqyly, al jolaýshylar quqy qalaı kúsheıtildi
Azamattyq avıatsııa komıteti 2021-2022 jyldar kezeńinde jolaýshylardan túsken ótinishterge sáıkes júrgizilgen taldaý qorytyndysy boıynsha jolaýshylardyń quqyqtaryn qorǵaý jónindegi normalardy kúsheıtýge baılanysty júıeli jumys júrgizdi.
Atap aıtqanda, 2022 jyldyń 29 jeltoqsanynda «Qazaqstan Respýblıkasynyń áýe keńistigin paıdalaný jáne avıatsııa qyzmeti týraly» Zańǵa tıisti túzetýler men 2023 jyldyń 14 naýryzynda Jolaýshylardy, joljúgin jáne júkterdi áýe kóligimen tasymaldaý erejelerine ózgerister engizildi. Soǵan sáıkes:
1) Avıakompanııalardyń jolaýshylar aldyndaǵy jaýapkershiligin kúsheıtý úshin «reıs mártebesin ózgertý» uǵymyn engizý. Buǵan deıin jyly tamaq usyný, qonaq úıde kúneltý jáne oǵan baryp qaıtý qyzmetteri reıs keshiktirilgen nemese toqtatylǵan jaǵdaıda ǵana berilip kelgen. Endi tasymaldaýshylar joǵaryda atalǵan qyzmetterdi reıstiń ushyp kelý ýaqytyna nemese baǵytyna áser etetin kez kelgen ózgerister kezinde usynýǵa mindetti.
2) Eger de jolaýshy avıakompanııanyń qyzmetin paıdalanýǵa shekteýli (osyǵan deıin atalǵan norma bolmaǵan) tulǵalardyń tiziminde bolǵan jaǵdaıda tasymaldaýshynyń bastamasymen áýe tasymaly toqtatylýy múmkin. Bul norma «qara tizimdegi» destrýktıvti jolaýshylarǵa baılanysty engizilip otyr. Avıakompanııa jolaýshynyń is-áreketterinen ákimshilik nemese qylmystyq quqyq buzýshylyq belgileri baıqalǵan jaǵdaıda ǵana «qara tizimge» qosýǵa quqyly.
3) Jolaýshyny jeke telefon nómiri men elektrondy poshtasy arqyly reıstiń keshigýi, sondaı-aq onyń bul jaǵdaıdaǵy quqyqtary týraly mindetti túrde habardar etý (bul norma qarastyrylmaǵan edi). Buǵan deıin mundaı jumys erikti túrde júrgizilip keldi. Biraq, jekelegen kompanııalar bul tájirıbeni múldem ustanbaǵan, al keıbir jaǵdaıda aqyly negizde qyzmet kórsetken.
Bul rette avıakompanııalar reıs mártebesiniń ózgerýi men jańa ushý ýaqytynyń sebepteri týraly nemese jańa marshrýt jóninde habarlandyrýdan bólek, atalǵan ózgerister tasymaldaýshynyń kinásinen, ıá bolmasa ushaqtyń keshigýinen bolǵan jaǵdaıda reıs mártebesiniń ózgerýine baılanysty usynylatyn qyzmetter tizbesi jóninde de aqparattandyrýǵa mindetti.
Osyǵan baılanysty elimizdiń avıatsııalyq bıligi jolaýshylardan bıletterdi satyp alý kezinde jeke baılanys málimetterin (uıaly nómir men elektrondy mekenjaıdy) kórsetýin suraıdy.
4) Tasymaldaýshy uıymnyń kesirinen reıs mártebesi ózgergen jaǵdaıda qyzmet kórsetý men 3% mólsherinde aıyppuldy tóleý túrinde áýe kompanııalardyń jaýapkershiligin kúsheıtý, sondaı-aq aıyppul ótelmegen jaǵdaıda ákimshilik jaýapqa tartýdyń joldaryn qarastyrý (buǵan deıin bul tártip bolmaǵan). Júrgizilgen taldaý jekelegen qyzmet usynýshynyń jolaýshylarǵa ótemaqyny ýaqtyly tólemeıtinin kórsetti. Ókinishke qaraı, avıakompanııalardyń ushý kúninen bastap 6-7 aı kólemine deıin ótemaqyny tólemegen faktiler tirkelgen. Jańa norma reısti keshiktirgenine baılanysty ótemaqyny ýaqtyly tólemeıtin uıymdarǵa tıisti sharalardy qabyldaýǵa múmkindik beredi.
5) Reıstiń mártebesi 5 saǵat artyq ýaqyttan keıin ózgergen kezde qarajatty tolyq qaıtarý nemese qaıta brondaý quqyǵyn engizý. Osyǵan deıin bılet aqshasy reıs 10 saǵattan artyq ýaqyt asqan jaǵdaıda ǵana tolyq kólemde ótelip keldi. Alaıda, 10 saǵat ótkennen keıin áýe tasymalynyń ózektiligi joıylyp ketetini eskerilip, bul ýaqyt 5 saǵatqa deıin qysqardy.
Azamattyq avıatsııa komıteti men Qazaqstannyń avıatsııalyq ákimshiligi aldaǵy ýaqytta kelip túsetin ótinishterge taldaý júrgizip, qajet bolǵan jaǵdaıda halyqaralyq standarttar men álemdik úrdisti eskere otyra, osy baǵyttaǵy zańnamanyń talaptaryn qaıta qaraıtyn bolady.