Áýe kompanııalardyń qyzmeti de, ushaqtardyń tehnıkalyq sıpattamasy da úlken kúmán týdyrady - B. Smaǵul
«Infraqurylym - el ekonomıkasynyń kúretamyry. Biraq sońǵy jyldary áýe keńistiginde azamattarymyzdy tasymaldaıtyn ushaqtardyń tehnıkalyq sıpattamasy úlken kúmán týdyryp keledi. Osy tusta, 2012 jyly «Skat» áýe kompanııasynyń ótken jylǵy apaty esimizge túsedi. Biraq odan bólek, qolymyzdaǵy aqparattarǵa baılanysty memleketimiz «Samuryq-Qazyna» ulttyq ál-aýqat qory» AQ arqyly qatysyp otyrǵan «Eır Astana» kompanııasyna da týyndaıtyn saýal jeterlik», - deıdi depýtat.
Osy rette B. Smaǵul «Vremıa» gazetinen «Eır Astana» kompanııasynyń materıaldyq bazasyndaǵy 21 bort Karıb teńizindegi Arýba degen aral-memlekette tirkelgendigi jóninde aqparat oqyǵanyn, al áýe kompanııasynyń baspasóz ortalyǵy taratqan aqparatqa sáıkes, elimizdiń ekonomıkasyna 2008 jyly bul kompanııa tek 1 mln. 946 myń 793 teńge tólegenin alǵa tarty. «Bul óte kúmándi sandar bulyńǵyr oı qalyptastyrady. Ekinshiden, buqaralyq aqparat quraldarynda apta saıyn «Eır Astanaǵa» baılanysty jaǵymsyz jańalyqty estıtin boldyq. 2012 jyldyń 28 qazanynda Atyraýdan Ystambulǵa ushqan ushaq túrik jerine taban tiregennen keıin, isten shyqqan. Ústimizdegi jyldyń 27 qazan kúni Malaızııanyń astanasy Kýala-Lýmpýrdan Almatyǵa ushatyn áýe borty 30 saǵatqa keshiktirgen. Onyń qosalqy quraldary Londonnan ákelingen delinedi. 9 qarasha kúni Birikken Arab Ámirlikteriniń astanasy Ábý-Dabıge ushatyn ushaq isten shyǵyp, jolaýshylar rezervtegi ushaqpen ushqan», - deıdi depýtat B. Smaǵul. Osylardy aıta kele, depýtat birneshe saýaldy ortaǵa tastady. «Eır Astana» kompanııasynyń áýe borttarynyń búgingi kúngi materıaldyq-tehnıkalyq jaǵdaıy qandaı? Memlekettiń baılyǵy óz azamattaryna bul kompanııa jaqsy qyzmet kórsetip otyr ma? Kólik jáne kommýnıkatsııa mınıstrligi áýe keńistigindegi qaýipsizdik máselesine qanshalyqty kóńil bólip otyr? «Skat» áýe kompanııasynan opat bolǵan oqıǵadan sabaq aldy ma? Offshorlyq júıemen Arýbada tirkelgen borttar arqyly elimizge qansha salyq syrttaı qalyp jatyr? Eń basty suraq, «EKSPO-2017» deımiz, «Qazaqstan-2050» deımiz, úlken damý kezeńderiniń aldynda ulttyq kompanııalar ózderine júktelgen jaýapkershilikti sezinip jatyr ma?» - dedi ol.