Áýe aılaqtarynyń mańyna qurylys salý talaptary ózgertiledi

ASTANA. QazAqparat – Indýstrııa jáne ınfraqurylymdyq damý mınıstrligi áýe kemeleriniń ushý qaýipsizdigine qater tóndirýi múmkin qyzmetterge ruqsat berý qaǵıdasyna ózgeris engizbekshi, dep habarlaıdy QazAqparat tilshisi.

Buǵan deıin Bas prokýratýra Májilis depýtattarynyń saýalyna joldaǵan jaýabynda áýejaılardyń mańyna 350 nysan zańsyz salynǵany týraly aıtqan edi.

Endi Indýstrııa jáne ınfraqurylymdyq damý mınıstrligi áýe kemeleriniń ushý qaýipsizdigine qater tóndirýi múmkin qyzmetterge ruqsat berý qaǵıdasyna ózgeris engizbekshi.

Tıisti Úkimet qaýlysynyń qoldanystaǵy redaktsııasynda áýe aılaǵynyń mańaıyna qandaı nysandar salýǵa bolmaıtyny bir sóılemmen ǵana berilgen. Osy talapty túrli mazmunda tápsirleý saldarynan shatasý bolmaý úshin jańa redaktsııaǵa birneshe naqtylaý engizilmekshi.

«Áýe aılaǵyn baqylaý núktesinen 15 km jaqyn qashyqtyqta taǵam qaldyqtaryn tastaıtyn oryndardy, ań fermalaryn, qasaphanalardy jáne qustardy tartýmen jáne olardyń toptalyp jınalýymen erekshelenetin basqa da obektiler qurylysyn ornalastyrýǵa tyıym salynady», - delingen qoldanystaǵy redaktsııada.

Al usynylyp otyrǵan redaktsııada bul tarmaqqa birneshe tarmaqsha qosylǵan.

Naqtyraq aıtsaq, áýe aılaǵynyń mańaıynda mynandaı sanattaǵy nysandardy jobalaý, salý, ornalastyrý, keńeıtý, qaıta jaraqtaý kezinde ruqsat alý talap etiledi:

1) Ushý-qoný jolaǵynyń eń jaqyn núktesinen 4 kılometrge deıingi qashyqtyqtaǵy kez kelgen bıiktiktegi barlyq obektiler;

2) áýe aılaǵynyń deńgeıine qatysty bıiktigi 45 metr jáne odan joǵary, áýeaılaǵynyń baqylaý núktesinen 15 shaqyrym qashyqtyqta ornalasqan obektiler;

3) menshikti bıiktigi 100 m jáne odan da kóp obektiler;

4) qyzmeti áýe aılaǵynyń baqylaý núktesinen 15 km-ge deıingi qashyqtyqta kórinýdiń nasharlaýyna (bý, tútin shyǵaryndylary jáne t.b.) ákep soǵatyn ónerkásip jáne ózge de uıymdar, qurylysjaılar;

5) baılanys jelileri, elektr berý jelileri, avıatsııalyq radıotehnıka quraldary men jaryq-sıgnaldyq jabdyqtyń qalypty jumysyna kedergi keltiretin, áýe aılaǵyn baqylaý núktesinen 15 km-ge deıingi qashyqtyqta pılottardyń kózin qaryqtyratyn radıotolqyn men túrli sáýle taratatyn obektiler;

6) ornalasqan jerine qaramastan aǵyzylatyn gazdardy avarııalyq jaǵýǵa arnalǵan alaý qurylǵylary;

7) jarylys qaýpi bar obektiler;

8) áýe aılaǵyn baqylaý núktesinen 13 shaqyrym radıýste ornalasatyn ań jáne mal sharýashylyǵy fermalary, qasaphana, basqa aýyl sharýashylyǵy qyzmeti.