Áýe apatynan zardap shekkenderdiń jaǵdaıy jaqsaryp keledi

NUR-SULTAN. QazAqparat - Qazirgi ýaqytta Nur-Sultan jáne Almaty qalalarynyń medıtsınalyq uıymdarynda áýe apatynan zardap shekken 34 patsıent, onyń ishinde 7 bala bar. Bul týraly QR Densaýlyq saqtaý mınıstrliginiń baspasóz qyzmetinen málim etti, dep habarlaıdy QazAqparat tilshisi.

«Medıtsınalyq uıymdardyń reanımatsııa bólimshesinde 2 patsıent emdelýde (Almaty kópbeıindi klınıkalyq aýrýhanasynda - 1 naýqas, Nur-Sultan qalasyndaǵy Travmatologııa jáne ortopedııa ǵylymı-zertteý ınstıtýtynda - 1 naýqas). Barlyq zardap shekken, onyń ishinde ońtústik astanada reanımatsııada jatqan patsıentterdiń jaǵdaıy turaqty, dınamıkada jaqsarýy baıqalady», - dep atap ótedi mınıstrlikten.

Vedomstvo málimetinshe, áýe apatynan zardap shekken úsh adam sanıtarııalyq avıatsııa arqyly odan ári emdelý úshin Nur-Sultan qalasyndaǵy Travmatologııa jáne ortopedııa ǵylymı-zertteý ınstıtýtyna jetkizildi. Jalpy dárigerler 23 operatsııa jasady. Barlyq jasalǵan operatsııalar sátti ótti. Balalarǵa arnalǵan jedel medıtsınalyq kómek kórsetý ortalyǵynyń travmatologtary eki balaǵa joǵary tehnologııalyq medıtsınalyq qyzmetterdi qoldana otyryp, kesýsiz operatsııa jasady.

«Mundaı operatsııanyń artyqshylyǵy - onyń eń az jaraqattanýy jáne operatsııalyq emdeýden keıin birneshe kúnnen soń synǵan aıaq-qolǵa kúsh salýǵa bolady. Áýe apatynda zardap shekkenderge qajetti emdeý kórsetilip jatqanyn aıta ketý qajet. Respýblıkalyq ǴZI men ortalyqtardyń úzdik mamandary tartyldy», - delingen mınıstrlik aqparatynda.