Aýdıt: Májilis depýtaty qus etine sýbsıdııa alyp otyrǵan kásiporyndardy jaqtap sóıledi

<p>ASTANA. KAZINFORM &ndash; Májiliste aýyl sharýashylyǵyndaǵy sýbsıdııalardyń tıimdiligine jasalǵan aýdıttiń qorytyndysy qaralyp jatyr.&nbsp;</p>

Talqylaý kezinde Májilistegi agrarlyq máseleler komıtetiniń tóraǵasy Serik Egizbaev qus etin óndirgeni úshin memleketten sýbsıdııa alyp otyrǵan kásiporyndardyń múddesin qorǵap sóıledi. 

— Komıtet Aýdıtorlyq palatanyń keıbir qorytyndylarymen kelispeıdi. Mysaly, shaǵyn agroqurylymdar men jeke qosalqy qojalyqtar iri agroqurylymdarǵa qaraǵanda egin ónimdiligi men mal sharýashylyǵy boıynsha joǵary kórsetkish kórsetip otyrǵany týraly tujyrymy durys emes bolyp kórinedi. Bizdiń oıymyzsha, bul jaǵdaı resmı statıstıkanyń burmalanyp berilýimen, kórsetkishterdi qosyp jazýmen baılanysty, — dedi Serik Egizbaev.

Sondaı-aq depýtat shaǵyn qojalyqtar men iri agroqurylymdardyń qarjylaı qoldaýǵa qol jetkizý múmkindikteri árkelki ekeni týraly paıymdarmen kelispeıtinin aıtty. 

— Sýbsıdııalar shyǵyndar úshin ótemaqy retinde tólenedi. Erejeler barlyq sharýashylyqtar úshin olardyń mólsherine qaramastan teń. Kim shyǵyn shyǵarsa, sol sýbsıdııa alady, — deıdi komıtet tóraǵasy.

Serik Egizbaev Joǵary aýdıtorlyq palatanyń qus etin óndirýshilerge tólep jatqan sýbsıdııanyń nátıje bermeı jatqany týraly qorytyndysyna da kúmánmen qaraıtynyn aıtty.

— Biz ishki naryqtaǵy óndiristiń 50%-yn alatyn osy saladaǵy sharýanyń qyzmetin taldadyq. Memlekettik qoldaý sharalarynyń arqasynda bul naýqan sońǵy bes jylda qus etin óndirý kólemin 29 myń tonnadan 160 myń tonnaǵa deıin ulǵaıtqan. Bul rette bıýdjetke salynatyn salyqtar men óndiriske salynǵan ınvestıtsııalardyń jalpy somasy alynǵan sýbsıdııalar somasynan tórt esege jýyq asyp tústi. Bul tıimsiz be, — dedi Májilis depýtaty.

Sóz aıaǵynda Serik Egizbaev Joǵary aýdıtorlyq palatanyń tekserý júrgizgen mamandarynyń tájirıbesine kúmán keltirdi.

— Osyǵan baılanysty Joǵary aýdıtorlyq palataǵa tekserýlerge ekonomıkanyń tıisti salalarynda tájirıbesi bar sarapshylardy tartýdy usynamyz, — dedi ol.

Eske sala keteıik, buǵan deıin Májilistiń Agrarlyq máseleler komıteti tóraǵasy Serik Egizbaevpen sýbsıdııalaý sharýalarǵa qandaı jańa múmkindikter beretini jóninde suhbat jarııalanǵan bolatyn.