Aýdıt: Bıýdjettiń 113 mlrd teńgesine qarjylyq buzýshylyqtar anyqtaldy

ASTANA. QazAqparat – Jyl basynan beri bıýdjet qarajatynyń shamamen 644 mlrd teńgesine aýdıt júrgizildi. Bul týraly QR Premer-Mınıstriniń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Bıylǵy 6 aıda bıýdjettiń 7,4 trln teńgesine 258 myńǵa jýyq memlekettik satyp alý rásimderi kameralyq baqylaýmen qamtyldy. Tekserý qorytysy boıynsha 35 892 rásimde buzýshylyqtar anyqtaldy, onyń ishinde memlekettik aýdıt obektileri buzýshylyqtardy joıý týraly habarlamalardyń 91% oryndady», - dedi mınıstr Úkimettiń búgingi otyrysynda.

Mınıstrdiń aıtýynsha, 1 138 aýdıtorlyq is-shara ótkizildi. Bıýdjet qarajatynyń shamamen 644 mlrd teńgesine aýdıt júrgizildi.

«Shamamen 113 mlrd teńge somasynda qarjylyq buzýshylyqtar anyqtaldy. Taýarlardy jetkizý, qyzmetterdi kórsetý men jumystardy oryndaý, bıýdjetke óteý jáne esepke alý boıynsha kórsetý jolymen 101 mlrd teńgege buzýshylyqtar joıyldy. Aýdıt obektileri qyzmetin jetildirý jáne tıimdiligin arttyrý úshin 1 172 usynym berildi», - dedi Erulan Jamaýbaev.